Liverpool chhandamtu Nunez & Alisson

Manchester City laka hnehna an chan hnuin Liverpool chuan hnehna an chang ve leh ta a, an mikhual West Ham chu Nilaini zan khan 1-0 in an hneh - Liverpool goal awmchhun hi Darwin Nunez a khung a ni.

Nunez hian minute 22-naah Kostas Tsimikas-a ball cross a tauh lut a, a vanneih zan ni se hattrick siam thei dinhmunah a ding - vawi khat chu post a pet per a, Hammers keeper Lukasz Fabianski chuan vawi hnih chu ṭha zetin a dansak bawk.

Kum 23 mi Nunez-a'n a match hnuhnung paliah goal thum a khung ta a, Reds tan match 12-ah goal nga a khung tawh a, assist vawi khat a nei - Diogo Jota leh Luis Diaz te an inhliam avangin Nunez chet ṭhat hi Liverpool tan a pawimawh lehzual.

Liverpool manager Jurgen Klopp chuan, "A khel ṭha takzet. Player talent nei ṭha a ni a, a chungah beiseina sang tak kan nei a ni," tiin a striker a fak.

Hammers lakah Liverpool-in vawi 22 zet shot an nei a, chak an phu - chutihrual chuan Reds vanneihna sawi hmaih a thiang lo a, Joe Gomez-a'n Jarrod Bowen laka a foul avangin penalty chawi mah se Bowen-a pet chu Alisson-a'n a dansak.

Brazilian keeper hi City laka Mohamed Salah goal khung tur siamsaktu a ni a, Liverpool tan a hlutna a zual zel.