Benzema'n goal nen Ballon d'Or a lawm

Khawvela footballer ṭha ber chawimawina Ballon d'Or a dawn hnua an match hmasa berah Karim Benzema chuan goal a khung lehnghal a, Elche khelmualah Real Madrid chu 3-0 in hnehna a chanpui.

Real tan Federico Valverde leh Marco Asensio te chuan goal khat ve ve an khung bawk a, hun tawp thlenga goal dang lut loin 3-0 in Real an chak.

Carlo Ancelotti enkawl Real hian Pathianni zan khan El Clasico-ah Barcelona an lo hneh tawh a, an intawn hmain an point hmuh zat inang mah se Real an chak avangin point thumin an sang fal zui.

Nilaini zanah Real an chak leh ta a, Barcelona aiin point rukin an sang tawh. Nizan khan Catalan club hi an inlan a, he thu buatsaih a nih lai hian result kan hre hman lo - an result a zirin team pahnih inthlauhna hi a danglam leh thei ang.

Goal leh lo
Inkhel ṭan aṭanga minute rukna lekah Karim Benzema chuan goal hmahruai a khung nghalah a inngai a, mahse, referee-in video assistant referee a rawn hnuah Benzema tana assist tu Vinícius Júnior a lo offside avangin pawm a ni lo.

Mahse, Real an insum rei lo - minute 11-naah Valverde a inlar a, kum 24 mi midfielder hian penalty box pawn aṭangin a ke vei lam hmangin mawi zetin a thlawh lut. Uruguay international hian league match hnih chu a zawnin goal a khung ta.

Real tan David Alaba chuan minute 25-naah a belhchhahah inngai mah se offside vang thoin pawm a ni lo a, Real-in goal thum an khung zinga goal khat chiah first half-ah pawm a ni, tihna a ni!

Alaba goal khung pawmsak a nih loh hnuah Nicolás Fernández Mercau chuan Elche tan si phurh sutna remchang a nei a, mahse, a shot ṭha tak chu Real keeper Andriy Lunin chuan a dansak.

A hunah Benzema
Real-in first half-ah goal khat chauh an khung a, Elche lakah an dinhmun a him bik lo - minute 50-naah Benzema chuan chance nei mah se, penalty box pawn aṭanga a shot ṭha tak chu Elche keeper Édgar Badía chuan a dansak a, a goal khung chu offside vangin pawm a ni lo leh bawk.

Kum 34 mi Benzema a vanduai reng lo - minute 75-naah Rodrygo siamsak ṭha zet chu goal-ah a chantir a, Benzema tan tun season match 11 a khelh aṭanga goal ruk a khungna a ni a, assist vawi khat a nei tawh bawk.

Benzema goal khung hma hian Elche tan Carlos Clerc chuan hnai set sawtah a tauh goal lo a, Lunin-a'n ṭha zetin a dansak - Benzema-a'n a hrem zui a, a tawpna a la ni lo cheu.

Hun tawp nan minute khat chauh a awm tawh tihah Asensio chuan goal khat a rawn khung ve leh a, Elche tan thawh leh ngaihna a awm tawh loh avangin 3-0 in Real an chak - table chung berah an awm zel a, an hneh tak Elche erawh point thum nen a mawng phah luahtu an ni zel.