WTA Finals khel tur Gauff leh Garcia

Coco Gauff leh Caroline Garcia te chu WTA Finals khel turin an invaw tling. Player pahnih hian Guadalajara Open khelh laiah second round an paltlang a, season kal laia che ṭha zual pariat inelnaa tel turin an tling nghal bawk.

Seeded pangana Gauff hi a khelh ṭhat ber ṭum a ni lo, mahse, a khingpui Italy nula Elisabetta Cocciaretto chu 7-6(1), 6-3 in a hneh thei tho a, double fault vawi nga tehmeuh nei chungin hnehna a la chang thei tho a ni.

American tleirawl Gauff chuan, "Tournament kan khelh hma khan WTA Finals atan tlin theihna kawng a inhawng tih ka hria, tun ṭuma match kan khelh dawn erawh kha chuan chu chu ka rilruah a lang phak lo.

"Ka tan chuan thil thar a ni dawn, a thiam zual bikte zinga tel ve hrim hrim pawh kha thil lawmawm a ni," a ti, tun dinhmunah kum 19 mi chauh a la ni a, 2005 hnu lamah WTA Finals khelh thei naupang ber a ni ang.

Inkhel dangah Garcia hian fiahna a paltlang, seeded parukna hi Rebecca Marino nen an inkhel tawk hle, set hmasa berah 7-6 (7-2) in chak lo mah se, set hnuhnung pahnih erawh 3-6, 6-7 (5-7) in a la.

Aryna Sabalenka erawh a chak lo. Russian player Liudmila Samsonova lakah Sabalenka hi 6-4, 2-6, 6-2 in a chak lo, world number 4 hi tun hnai a match 22 zinga 20 zetah chak thei mah se tunah chuan a vanduai ni a tawng.

Tun hma lama lo champion tawh Victoria Azarenka a vannei. Azarenka hi seeded pakhatna Paula Badosa nen an intawng a, bul ṭan fuh zawkin set hmasa ber chu 6-2 in a la, a hnu lamah Badosa hian thawk lamah harsatna a neih avangin a inkhel zui thei ta lo a ni.