Bukin an awm dawn Ireland vs Windies; Scotland vs Zimbabwe

T20 World Cup group stage chu vawiin hian khelh zawh a ni dawn a, group B team paliten point hnih vek an hmuh avangin a ngaihnawm danglam hle.

Chawhma dar 9:30-ah Ireland leh West Indies te Bellerive Oval, Hobart-ah an inkhel dawn. Tlai dar 1:30-ah Scotland leh Zimbabwe te a hmun ngaiah tho an khel ve leh ang.

Windies-in Scotland hneh loin bul ṭan mah se Zimbabwe lakah an theihna an lantir a, Ireland ai chuan an buk a rit zawk. Point hnih ṭheuh an hmuh avangin NRR-ah buai a ngai lo, a chak zawk an tling dawn.

Zimbabwe hian tun hma an pha tawh bik lo a, Scotland laka chak chiang saa dah a rem lo. Chutihrualin tu zawk pawh chak se, Super 12-ah chuan 'point box' tih theih tur an ni ang.