Last 16-ah Prannoy a lut

Badminton inelna Denmark Open khelh laiah HS Prannoy chuan last 16 a invaw kai. Indian tlangval hian Zhao Jun Peng chu 21-13, 22-20 in a hneh. Chinese tlangval laka hnehna chang tur hian minute 43 chhung hun a hmang.

Super 750 tournament-ah hian Prannoy hian Lakshya Sen a hmachhawn leh dawn, Indian player tu emaw zawk chuan quarterfinal an lut dawn chiang tihna a ni a, pakhat zinkawng a tawp thung dawn a ni.

Hmeichhe lamah Saina Nehwal chuan beisei a phak lo. London Olympic 2012 bronze medalist hian a match hmasa berah Zhang Yi Man chu minute 48 chhungin 17-21, 21-19 ,11-21 in a ngam lo thung.

Player pahnih hi February thla khan Macau Open-ah an lo intawng tawh a, an inkhelh hmasak pawhin Saina zawk a chak lo - a zawnin Chinese nula lakah a tlawm ta tihna a ni. Saina a tlak takah chuan hmeichhe singles lamah Indian player dang an awm tawh lo.