German Cup ; Bayern Munich leh Dortmund an tlang

Nilaini zan khan German Cup second round khelh a ni a, team ṭha Bayern Munich chuan goal an chhuah hmasak hnuah Augsburg chu 5-2 in an lehthal a, inkhel dangah Borussia Dortmund chuan harsatna nei loin Hannover 2-0 in an hneh ve bawk.

WWK Arena-a inkhelah, mualneitu Augsburg lamin minute kuana lekah Mads Pedersen hmangin goal an khung a, lawmawm viau mah se he goal hi German champion Bayern Munich chhaih kawlhtu mai a ni.

Bayern hian Eric Maxim Choupo-Moting hmangin an sut a, player ṭha Joshua Kimmich hmanga hmahruaina an khung hnuah Choupo-Moting bawkin a khung belh, season hmang ṭha Jamal Musiala leh Alphonso Davis ten an khung belh ve bawk.

Julian Nagelsmann-a naute hian Bundesliga lamah beisei angin a bul an ṭan fuh lo a, match 10 aṭanga point 19 hmuin pahnihna an ni mek. DFB-Pokal-ah pawh an chesual leh ṭep a, goal khung thei viau mah se a venhim dan an zir ṭhat a la ngai.

Borussia Dortmund tan Jude Bellingham bawk a langsar. England international hian bench aṭanga a luh hnu minute 10 lekah penalty a hlawh chhuak a, goal atan a chantir, inkhel tir lamah Hannover defender Bright Arrey-Mbi chuan anmahni lamah a lo ti lut tawh bawk.

Inkhel dangah Bundesliga hmahruai mektu Union Berlin chuan Hannover 96 chu 2-0 in an hneh, goal pahnih hi Tymoteusz Puchacz leh Sven Michel te khung a ni.

Inkhel Results
Luubeck 0 - 3 Mainz
Stuttgarter Kickers 0 - 2 Eintracht Frankfurt
Waldhof Mannheim 0 - 1 Nurnberg
RB Leipzig 4 - 0 Hamburg
Elversberg 0 - 1 Bochum
Eintracht Braunschweig 1 - 2 Wolfsburg
Hoffenheim 5 - 1 Schalke 04
Darmstadt 2 - 1 Borussia M'gladbach
Hannover 96 0 - 2 Borussia Dortmund
Freiburg 2 - 1 St. Pauli
Sandhausen 2 - 2 Karlsruhe
Paderborn 2 - 2 Werder Bremen
Augsburg 2 - 5 Bayern Munich
Stuttgart 6 - 0 Arminia Bielefeld
Union Berlin 2 - 0 Heidenheim
Jahn Regensburg 0 - 3 Fortuna Dusseldorf