Chelsea leh Brentford inhnehtawk

Graham Potter an neih hnuah Chelsea an kaltluang, tun hnaiah match sarih chhung chu tlawm loin an awm ta. Mahse, Nilaini zan Premier League inkhel result erawh an duhthusam erawh a ni lo mai thei, khualmualah Brentford nen 0-0 in an inhnehtawk.

Gtech Community Stadium-ah Brentford an khel ṭha viau a, mahse Blues goalkeeper Kepa Arrizabalaga an paltlang thei lo. Spanish keeper hian Ivan Toney-a tauh luh tur bakah Bryan Mbeumo khung tur chu ṭha takin a lo dang.

Brentford keeper David Raya pawh a thawkrim ve tho, ani hian Cesar Azpilicueta leh Kai Havertz te khung tur chu harsa takin a lo dansak ve bawk a, substitute pahnih Pierre-Emerick Aubameyang leh Christian Pulisic te pawhin an hun ṭha an chhawr thei bik lo.

Potter-a enkawl Blues hi Premier League table-ah palina an ni a, khelh zat inangah hmahruaitu Arsenal chu point sarihin an phak lo. Point 15 neitu Brighton chu pariatnaah an la awm thung.

Bees manager Thomas Frank tan pawh Chelsea laka an khelh dan kha lawmna tur a ni ang, anmahni khelmual a ni bawka hun tam zawk chu team ṭha zawk an ni thei a, an vanneih zan ni ngat se la chuan point thum hlawh chhuah phu khawpin an khel.

Inkhelh banah Kepa chungchangin sawi zui a hlawh. Spanish goalkeeper hi season tirah kha chuan Edouard Mendy-a thachhang dawltu mai a ni a, tun hnaiah erawh inelna hrang hrangah a zawnin match nga chhung goal a chhuah ta lo.

Potter-a'n Kepa a ring ngam a, inkhel bul ṭantu zawkah a hmang ta zel. Kepa chuan, "A zawna match khelh theih hi a pawimawh, a chhan chu inrintawkna kan neih belh zel a ni, tun anga khel tur hian ka bei zel ang," tiin a inringtawk leh ta hle.

Chelsea hian Inrinni zan hian Stamford Bridge-ah Manchester United an mikhual dawn, manager tharin an enkawl team pahnih hi tun hnaia hmasawn ve ve an ni a, inkhel a hmuhnawm khawp ang.