Zaninah MPL9 semifinal khel tur zawnna? Chawnpui FC vs Chhinga Veng FC
Honda MPL9-ah Chhinga Vengin hneh loh an la tawng lo a, Chhingcows hi khel ṭha viauin lang mah se Chawnpui FC nen an inthlauhna chu point khat chauh a ni.
Zanin dar 7:00 hian RG Stadium-ah Lalsangzuala Hmar kaihhruai Chawnpui FC-in Chhingcows an hmachhawn dawn. League match khelh tur la tam mah se semifinal khel tur zawnna tihin a sawi theih.
Football Chhiarkawp
Football-ah hian hneh loh la tawng lo, tih hi a ṭha lam sawina a ni. MPL9-ah hian Chhinga Veng chiahin hneh loh an la tawng lo a, an khel ṭha tihin a sawi theih.
Mahse, table thlirin Chhinga Veng hi palinaah an awm chauh. Hei chauh hi a ni lo, Chhingcows hi Chawnpui lakah an tlawm a nih phei chuan a sang pali zingah an tel phak dawn lo.
Hei vang hian football chhiarkawp awlsam te hi bel a ṭha a, a chak zawkin point thum an hmu a, an inhnehtawkin point khat ve ve an insem a, a chak lo zawkin point an hmu lo tihte chu mitin hriar a ni.
Football chhiarkawp hian game plan a nghawng a, relegate hlau club tana point hmuh hrim hrim a hlut rualin semifinal khelh tum tan risk lak ngaih hun a awm. Chhingcows hian match sarih aṭangin vawi nga ngawt an draw a, point 15 hmuh theihah point nga chauh an hmuh avangin point 10 an hloh. Vawi nga inkhelah hian vawi thum chak loin vawi hnih chak se, a point ang zawnga thlir chuan a ṭha zawk.
Engtin zel?
Khawzawlah Chhinga Veng hian Aizawl FC lakah goal hnih an khung hmasa a, an goal neih hi an hum zo lo. Round hnuhnung berah Bethlehem nen an inhmachhawn a, goal awm loin an inhnehtawk.
Chhingcows hian FCB lakah thapui chhuah an mamawh a, goal venhim an ngaih pawimawh zawk avangin Chawnpui nena an inkhel tur hi a harsat phah dawn.
Chawnpui hian Chhinga Veng an hneh loh hnuah Chanmari leh Electric Veng an hneh a, table mawnglam aṭangin panganaah an invawrhchho. Sanga hote hian Chhinga Veng hi an hneh chuan pathumnaah an awm thei hial dawn.
Chhinga Veng hian damlohna vangin striker Lalrinzuala chhawr thei lo mah se Lawmtluanga'n Khawzawl aṭangin team a rawn zawm. Chawnpui aia Chhinga Veng thlangtu Lawmtluanga hian hmun pawimawh a chang dawn.
Chawnpuiin par an chhuah ṭan avangin ṭantu pawh an nei ṭha turah a ngaih theih a, Chhinga Veng tun hmaa an boruak 'nuam, nuam, nuam' pha turin khelmual chhung leh pawnah hmasawn an ngai.