Coutinho a vanneih a ngai - Gerrard

Aston Villa manager Steven Gerrard chuan Philippe Coutinho theihna a la ringhlel lo. Brazilian midfielder hian a theihna ang tak pho chhuak leh turin vanneihna a mamawh tih erawh a sawi.

Countinho hian tun season-ah Villa tan match 11 a khel tawh a, goal a la khung loh bakah a ṭhiante khung tur a la siamsak miah lo. Tunhma lama a chet ṭhin dan nena khaikhin chuan a chet ṭhat loh lai tak a ni.

Gerrard chuan, "A kum leh theihna ka hrechiang a, a lakah rinna ka nghat pumhlum. Tun hnaia a statistics en chuan a tana hun ṭha ber a ni lo mai thei, mahse kei hi manager ka nih chhung chuan kan thlawp tlat dawn.

"Training-na lamah theihtawp a chhuah a, khelmual chhungah pawh midang tan a ṭangkai. Vanneihna tlem a neih belh zeuh chuan sang takah a invawrh chho leh thei ang," tiin a sawi a, a player lakah beiseina a la nei sang.