Point hmuh thiam Magpies

Newcastle United inkhel a hmuhnawm ṭhin viau mai, manager Eddie Howe pawh a naute khelh danah a lungawi. Magpies hian an mikhual Everton chu 1-0 in an hneh, goal awmchhun hi Miguel Almiron-a khung a ni.

Paraguay international hian yard 25-a hla aṭangin goal awmchhun hi a khung a, season kal laia goal nga a khung tlinna a ni nghal bawk. Howe-a naute hi match ruk chhung tlawm loin an kal ta, Premier League table-ah parukna an ni bawk.

Magpies tana thu lawmawm pakhat chu midfielder Bruno Guimaraes a khel ṭha leh ta kha a ni, season hmasa khan Guimaraes hian danglamna a lo siam tawh, tun season chu hliamin a tibuai, tunah erawh team innghahna a ni leh thei ta.

Everton erawh an che fuh hleithei lo. Striker Dominic Calvert-Lewin chuan tun season atan a vawi khat nan inkhel bul a ṭan a, England international hian goal a keng tel lo - Frank Lampard enkawl team hi season hmasa ang bawkin a mawng lamah an buai leh dawn niin a lang.

Hnehna changtu Newcastle manager Eddie Howe chuan, "Hmasawnna hi vawi leh khata lo thleng thut thei a ni bik lo, zawi muangin team nghet tak kan din chho mek. Tuna kan awmna hi a ṭha thawkhat viau, hei aia hmasawn tur erawh kan la ni," a ti.

Lampard erawhin tun hnaiah Manchester United, Tottenham Hostpur leh Newcastle te khualmuala an hmachhawn vek thu a sawi a, an fixture a hautak rualin an duh leh beisei anga an la khelh loh thu a sawi bawk.

Nilaini zan Premier League inkhel dangah Southampton chuan AFC Bournemouth chu 1-0 in an luh chhuah, khualmuala goal awmchhun hi Che Adams-a'n minute kuana leka a khung a ni a, anmahni goal an venhim theih bawk avangin point thum hmuh nan a tawk a ni.