FCB 3-3 EFC: Goal ruk, red card leh penalty

Honda MPL9-ah nimin tlai khan inkhel hmuhnawm chhawp chhuah a ni a, goal ruk luhna inkhelah FC Bethlehem leh Electric Veng FC te 3-3 in an inhnehtawk.

RG Stadium-a inkhelah hian football hmuhnawmin a ken tel - goal, red card, penalty leh mipui thawm ṭha a awm kim vek.

Victor Lalbiakmawia hoten player 10-a khel EFC lakah 3-1 in hma an hruai a, an goal neih an hum thei lo. Coach thar Lalremtluanga hnuaia khel Electric Vengin an siphurh an sut zo a, 3-3 a nih hnuah crossbar an pet per hial. Team pahnihin point khat ve ve an hmu a, coach pahnihte an lungawi lo ve ve ang.

Electric Veng leh Bethlehem an in cho tawk a, goal chance pawh a tam nghal. Thil thleng langsar erawh minute 36-naa thleng a ni a, EFC innghahna Vanlalremkima chu referee laka a ṭawngkam hman vangin hnawhchhuah a ni.

Coach RT-a hote player 10-in khel mah se injury time-ah F. Lalchhanchhuaha'n Bethlehem keeper tih ṭhat tawk loh chu goal-ah a chantir. Second half-ah erawh FCB-in an tamna an hmang ṭangkai a, JH Remlala'n goal mawi a khung hnuah Lalbiakdika'n a tauh goal a, substitute Lalrintluanga'n penalty aṭangin a khung leh bawk.

Minute 69-naah player tam zawk FCB-in 3-1 in hma an hruai a, chak tur a chiangah a ngaih theih. Mahse, Rampianmawia'n siphurh a sut ṭhen a, Jonathan Lalrawngbawla'n a khung leh bawk.

Electric Veng an phur chhunzawm a, Zothanpuia'n freekick-a'n woodwork a pet per. Hei chauh hi a ni lo, EFC-in penalty shout an nei a, Bethlehem an ṭang tluan hram.

October 20, Ningani
FC Bethlehem 3 - 3 Electric Veng FC
FCB: JH Remlala 53'; Lalbiakdika 63'; Lalrintluanga 69' (P)
EFC: F. Lalchhanchhuaha 45+3'; Rampianmawia 82'; Jonathan Lalrawngbawla 85'
MoM: Rampianmawia, EFC