FIFA U17 World Cup ; Spain ngamtu England-in ro an rel

Kum 1947-a India-in Britain awpna hnuai aṭanga zalenna a hmuh hmain Kolkata khawpuiah England hnam puanzar chawisanin a lo awm tawh ṭhin a, politics vang a ni. Kum 70 liam hnuah Kolkata khawpuiah England hnam puanzar chawisanin a awm leh ta a, football vang a ni tawh thung.

Inrinni zan khan FIFA Under 17 World Cup 2017 final khelh a ni a, si hnih an phurh hnuah England-in comeback ropui an lantir a, Spain chu 5-2 ngawtin an sawp - England-in World Cup nomawi an chawi. Inrinni zana final khelh hmain Brazil leh Mali-in pathumna hmunruak an inchuh bawk a, Brazil hi 2-0 in an chak.

Spain an vul hmasa
Inkhel ṭantir lamah Eng­land-in ball an chang tam a, counter attack-ah Spain an innghat thung. Three Lions lakah Spain-in an game 'plan' an hlawhtlinpui a, minute 31 chhungin goal hnih an khung - England-in vawi hnih ngawt ball an clear ṭhat tawk loh an tuar a, Barcelona forward Sergio Gomez chuan minute 10-na leh 31-naah goal a khung.

Spain-in awlsam taka goal hnih an khung avangin England hi Euro U17 final-a an hneh tawh loh ram lakah an tlawm nawn dawn niin a lang a, rin ang ngawt erawh a ni lo. Minute 44-naah Liverpool rawlthar Rhian Brewster-a'n an si phurh a sut ṭhen a, tun inelnaa a goal riatna a ni. England-in phur rit lutuk loin chawlhlawk an hman theih phah.

Lions an harh
Chawlhlawk hman a nih laiin England boss Steve Coo­per-a'n a naute a fuih ṭha tih a hriat a, second half ṭan a nih hnuah Young Lions inkhel a hmuhnawm takzet. England tan Manchester City midfielder Phil Foden che velin mit a tlung takzet a, Fulham right-back Steven Sessegnon leh Chelsea winger Callum Hudson-Odoi te lah Spain tan manganpui tlak khawpa thiam an ni.

Minute 58-naah England-in an si phurh an sut zo ta ngei a, Sessegnon-a siamsak chu Wolves forward Morgan Gibbs White chuan a khung. England an tlangnel tawlh tawlh a, Spain an talbuai tulh tulh thung. Minute 69-naah khel ṭha em em mai Foden-a'n an goal thumna a khung a, Chelsea defender Marc Guehi-a'n chhunzawm ve lehin minute 88-naa Foden-a'n a khung leh meuh chuan champion tur a chiang tawh.

Hmabak a êng?
England-in rawlthar an nei ṭha tih hai rual a ni ta lo - kuminah ringawt World Cup U17, Euro U19 leh World Cup U20 nomawi an chawi a, Euro U17-ah final lutin Euro U21-ah semifinal an lut bawk - an champion zawh lohna inelnaah pawh hian an chak lohna hi penalty ve ve a ni.

Three Lions ṭantute tan hmabak a eng tih loh rual a ni lo. Si phurh sut zotu kum 17 mi lek Morgan Gibbs-White khan Wolves tan season hmasa khan match sarih a khel daih tawh a, goal hmasa pahnih assist tu Sessegnon kha August thla khan Tottenham chuan pound maktaduai 25-in lakluh an lo tum tawh a, Phil Foden thiamzia chu Pep Guardiola titi tui ber a ni a, Reds rawlthar Brewster-a'n quarterfinal leh semifinal-ah a zawnin hattrick a siam thei bawk.

Cooper a hlim
England manager Steve Cooper chuan, "England team kha khel se kan tih ang takin kan khel a ni. Khelmual chhungah kan huaisen a, mimalin rei tak ball keng loin kan in pass kual a, kan khingpui goal hnaih thei ang bera awm reng kha kan tum a ni. Ka naute khelh danah ka lawm a, vawiinah hian England hma hun atan team kan din a, chutiang taka din niawm reng chuan kan khel a ni," a ti.

Cooper chuan sawi chhun­zawmin, "England-a club aca­demy-te thawhrah kan seng a, naupang chherna kawnga kan hmalakna chuan rah ṭha min pe ta. He nomawi hi ka tan chuan English football hi eng ang tak nge a lo nih reng tih pholanna a ni mai lo a, engtianga thui leh sang nge kan thlen theih tih pholanna a ni zawk. Dik taka sawi chuan sawi tur pawh ka nei lo, zan te han mu phawt ila, World Cup kan chawi tak tak tih hi ka awih ve mahna," a ti a, an hun tawn chu mumang ang maiah a ngai.

Champion Zinkawng
England
Group Stage
Chile 0 - 4 England
ENG: Callum Hudson-Odoi 5'; Jadon Sancho 51', 60'; Angel Gomes 81'
England 3 - 2 Mexico
ENG: Rhian Brewster 39'; Philip Foden 48'; Jadon Sancho 55' (P)
MEX: Diego Lainez 65', 72'
England 4 - 0 Iraq
ENG: Angel Gomes 11'; Emile Smith-Rowe 57'; Danny Loader 59', 71'
Round of 16
England 0 - 0 Japan
*Penalty-ah 5-3 in England an chak
Quarterfinal
USA 1 - 4 England
USA: Josh Sargent 72'
ENG: Rhian Brewster 11', 14', 90+6' (P); Morgan Gibbs-White Goal 64'
Semifinal
Brazil 1 - 3 England
BRA: Wesley David 21'
ENG: Rhian Brewster 10', 39', 77'
Final
England 5 - 2 Spain
ENG: Rhian Brewster 44'; Morgan Gibbs-White 58';
Phil Foden 69', 88'; Marc Guehi Goal 84'
SPA: Sergio Gómez 10', 31'
Third Place
Brazil 2 - 0 Mali
BRA: Alan Souza 55'; Yuri Alberto 88'
Golden Ball
(Player of the tournament)
Phil Foden England
Silver Ball
Sergio Gomez Spain
Bronze Ball
Rhian Brewster England
Golden Boot (Top Scorer)
Rhian Brewster (8 goals)
- England
Silver Boot
Lassana N'Diaye (6 goals) Mali
Bronze Boot
Abel Ruiz (6 goals) Spain
Golden Glove
(Best Goalkeeper)
Gabriel Brazão Brazil
FIFA Fair Play Award
Brazil