Takam ngamtu Joshua

Britain boxer Anthony Joshua chuan WBA leh IBF world heavyweight kawnghren a kawl lai chu Carlos Takam lakah a humhim a, Cameroonian boxer hi round 10-naah a knockout - Joshua tan vawi 20 inhnek a hmachhawna vawi 20 a chakna a ni a, a khingpuite a la knockout vek bawk!

Mahse, Joshua hian a beisei ang ngawtin hnehna erawh a chang lo. Round tir lamah Takam-a'n a hnar a hnek thi sak a, rin aiin kum 36 mi boxer hian a bei thei hle. Joshua erawh Joshua a ni reng - kum 28 mi boxer hian Takam-a mit a hnek thi sak a, vawi hnih ngawt medical lamin an check a ngai hial.

Round 10-naah Takam a talbuai a, Joshua-a'n ro a rel - referee-in inhnek a titawp a, inhnek tihtawpna tur khawpin Takam hi a talbuai erawhin a lang lo. Principality Stadium, Cardiff khawpuia inhnek en­tute referee thutluknaah an lungawi lo a, an au el hial.

Anthony Joshua chuan, "He hmunah hian inhnek tura lokal ka ni a, referee-te thutlukna chungchanga ngaihdan sawi tura lokal ka ni lo. Referee-in inhnek a tihtawp hma kha chuan fight ropui tak a ni a, kha vang tak khan Takam pawh khan zah a phu a ni. Mipui an lungawi lo kha ka hrethiam, Takam kha tlu ngei se, nikhaw hre loin tukdawl ila min duh a, keipawhin chu tho chu ka duh," a ti.

Takam chuan, "Joshua hi hmachhawn leh ka duh. Ani hmachhawn tur hian ni 12 chiah hun pek ka ni a, hmachhawn leh ngei ka duh a ni. Champion ropui tak a ni tih erawh phat tur a awm lo," tiin inhnek leh ngei a duh thu a sawi thung.