Muanawma leh Samuel-te an ngam huai

3rd Hrangbana Memorial Mizoram Badminton League khel tur player lilamna chu October 27 zan khan Synod Conference Centre-ah neih a ni a, Lalmuanawma leh Samuel Lalnunmawia te chu Hlimen Shuttlers leh Tuikual Shuttlers ten Rs 35,000 ve vea chhangin an man a to ber.

Auction zan hian MBL team pariatte hian player pali ṭheuh lakluh nan Rs 3,49,000 an hmang

MBL 3 hi November 13-24 chhungin Electric Veng YMA Hall-ah khelh a ni dawn a, team pariat - Chanmari Evening Stars, Hlimen Shuttlers, Kanan, Mission Veng, Tuikual Shuttlers, Zotlang, Champhai Ralte Villa BC leh Southern Acers Saiha te an inel dawn.

Player auction-ah hian team tin hian player pali ṭheuh - men's player pahnih, women's player pakhat leh under 19 player pakhat ṭheuh an la a, heng player pali la tur hian Rs 50,000 bak an hmang thei lo. Team pathum Kanan, Champhai Ralte Villa BC leh Southern Acers Saiha tih loh chuan an pawisa hman theih zat hi an hmang zo vek.

MBL hmasa ber champion Hlimen leh champion lai Tuikual ten Muanawma leh Samuel te lak nan an pawisa hman theih zat aṭanga 70% an hmang a, Mizoram Police BC player-te hi an theihna a san avangin an man a to hi mak hran lo. Hetihlai hian season liam taa manto ber Mizoram number 1 Manajit Singh erawh MBL3-ah a inlan theih dawn lo.

November 2 thleng team list thehluh theih a ni a, state pawn player pakhat ṭheuh an la thei a, team khatah hian shuttler 10 zel register theih a ni a, MBL atana in register tan chauh Mizorama badminton inelna sang berah hian tel theih a ni.