United-in Kane tel lohna Spurs hneh

Inrinni zan Premier League inkhelah Man­ches­ter United-in sub­stitute Anthony Martial goal hmangin Tottenham Hotspurs 1-0 in an hneh hram. Inkhelh banah Jose Mourinho ṭawng pawr mah se Spurs laka point thum an hlawhchhuah ni hian Harry Kane a tel miau loh avangin in­chhuang thei an ni bik lo.

Old Trafford-ah United-in bul an ṭan ṭha zawk a, Spurs tlangnel hnuah erawh Mauricio Pochettino nauten ball an inpe kual thiam tih an pholang a, goal erawh hmuh tur a awm lawk lo. United boss Jose Mou­rinho-a'n minute 70-naah Marcus Rashford aiah Martial a luhtir a, hei hi inkhel danglamna a ni.

French forward Mar­tial hian minute 81-naah Romelu Lukaku ball tauh sak chu um lutin Spurs keeper Hugo Lloris dan hman loin goal kilah a pet lut. United-in goal chance ṭha an ngah lo a, goal luh hmaa Belgian striker Lukaku-a'n goal ban a tauh per leh goal luh hnua Jesse Lingard-a'n keeper chauh a hmachhawn hnua a pet over chu ui tur langsar a ni.

Spurs-in Harry Kane a inhliam an tuar tih a lang a, English striker Kane tel lohna London club tlarhma a bil. Pochettino hote hian Kane-a tel loin League Cup-ah West Ham an hneh tawh lo a, United an hmachhawn ṭum hian chance ṭha an insiam thei lo. Chutihrualin ball pet thiam Christian Eriksen-a ball vawrh luh Dele Alli khung loh erawh pawi an ti khawp ang, Alli-a'n chance ṭha a hlah hian goal a la lut lo.

Spurs manager Mau­ricio Pochettino chuan, "Kan intluk tawk a, kan chak lo hi kan vanduai a ni. Hun tawp hma minute 10 chauh a awm tawh a, kan tihsual vanga goal kan chhuah kha a pawi a ni. Amaherawhchu, result kan thlak thei tawh lo a, chuvangin buai chiam tur a ni lo. Football-ah chuan tihsual a awm thei a, a rang lama insiamṭhat chu kan tum hmasak tur a ni," tiin point hmuh an phu thu a sawi.

Manchester United manager Jose Mourinho chuan, "Mi ṭhenkhat hi chu an ṭawng tam lutuk a, hetiang tur a ni lo. Awm hahdam hun te hi a awm ve tur a ni. Hlauhnthawn loh tur a nia, phur lutuk tur a ni lo. Keimah bikah chuan 0-0 emaw 1-1 emaw pawhin inkhel kha tawp se player-ten theihtawp an chhuah avangin an chunga ka rilru put hmang chu a la ngai reng a ni. Kan inkhelah rilru leh ngaihtuahna kan seng a, kan khingpui kha team ṭha tak an ni tih theihnghilh loh tur a ni," tiin Liverpool an draw ṭum leh kai thar Huddersfield an hneh loh ṭuma an khelh dan hmang sawiseltute a chhanglet.