Goal 100 khung thei Higuain

Gonzalo Higuain chuan Serie A bikah goal 100 a khung tling ta. Juventus striker Higuain hian Inrinni zan khan AC Milan lakah goal hnih khungin Turin club hi 2-0 in hnehna a chanpui.

Argentina striker Higuain hian ram tana a khelhpui Paulo Dybala hnen aṭanga a ball hmuh chu cool zeta khungin first half-ah si khat faiin hma a hruaipui a, second half-ah pawh Juve tan an tlarhma player pahnihte bawk an hmuhnawm leh, goal khungtu leh a siamsaktu pawh a ngai an ni.

Kum 29 mi Higuain hian La Liga club ropui Real Madrid aṭangin July 2013 khan Italy a pan a, Serie A club pahnih Napoli leh Juventus tan match a khelh zat belhkhawm chu 153 niin goal 101 a khung tling tawh - tun hnaiah league match hnuhnung panga bikah goal li a khung.

Juventus manager Massimiliano Allegri chuan, "Milan nen hian tun hma aṭang tawha inel kan ni a, a bik takin San Siro-ah ngat phei chuan point thum hmuh hi a awlsam lo hle, vawiinah chan kan tlarhma leh tlarhnung player an khel ṭha vek a ni," a ti.

Italian manager chuan sawi zawmin, "Khawvelah striker tam tak an awm a, a

ṭha bik erawh tlemte chauh an ni - Higuain hi a ṭha bikte zinga mi chu a ni. A thiamna hrechiangtu tan chuan hun rei lote chhunga goal 100 a khung tling mai hi a mak lo a, a la khung belh ngei pawh ka beisei," tiin a sawi.

Champion lai Juventus hian point 28 hmuin league hmahruaitu Napoli chu an nihrual a, mahse match khatin an khel hnem zawk - Nizan khan hneh loh la tawng lo Napoli hian Sassuolo an hmachhawn a, an result a zirin an inkar hi a danglam leh thei dawn a ni.

Hetihlai hian player thar 10 chuang lak nana pound maktaduai 200 vel hmangtu Milan erawhin point 16 bak an la hmu lo a, pariatna dinhmun an luah mek a, midang result a zirin tlahniam leh thei dinhmunah an la ding bawk - Vincenzo Montella naute hian insiamṭhat an mamawh takzet.

AC Milan manager Vincenzo Montella chuan, "Team kan indin chho mek a, kan nghet tawh viau emawh tih laiin Juventus nen chuan danglamna kan la nei. Khelmual chhungah kan danglamna sawi tur erawh a tam bik lo a, result siam danglamtu ber chu Higuain-a goal ropui pahnih kha a ni," tiin a sawi.

Inrinni zan Serie A inkhel dangah season hmasa pahnihna AS Roma chuan an mikhual Bologna chu si khat faiin an hneh a, table-ah pangana an ni - goal awmchhun hi minute 33-naa Italy international forward Stephan El Shaarawy-a'n a khung a ni.