Chelsea tan Hazard goal khat a tawk

Premier League cham­pion Chelsea chuan Eden Hazard-a goal khat hmangin Bourne­mouth an hneh. Inrinni zan league match dangah Arsenal, Liverpool leh Manchester City ten an khingpui ṭheuh an hneh bawk.

Antonio Conte nauten inkhel thunun chungin goal an khung thei lawk bik lo, minute 51-naah Hazard chuan he inkhela goal awmchhun chu a khung hram - Belgium international Hazard tan tun season chhunga a league goal hmasa ber a ni. Minute 90 chhungin mualneitu Bournemouth lam hian Blues goal zawnah vawi khat mah an pet ve thei lo.

Chelsea hian an league match hmasa berah Burnley an hneh lo a, hemi ṭum hian Italian manager Conte-a'n hliam vangin Hazard a chhawr theih loh bakah Gary Cahill leh Cesc Fabregas te hnawhchhuah an ni bawk. Blues hian season bul an ṭan fuh loh vangin sawisel an hlawh a, tunah chuan an dinhmun an sawhnghet chho ve leh mek.

Blues manager Conte chuan, "Hazard tel loin season bul kan ṭan a, kan player pawimawh ṭhenkhat an inhliam bakah hrem an awm bawk. Ka nauten huaisen takin an bei a, vawiina hnehna kan chan hian rah ṭha a chhuah ngei ka beisei," tiin a sawi.

Dan rual loh City

Pep Guardiola enkawl Man­ches­ter City chuan nomawi chawi ngei an tum zia lantir nan huaisen takin West Brom an nawr a, Leroy Sane, Fernandinho leh Raheem Sterling te goal hmangin 3-2 in hnehna an chang.

Spanish manager Pep-a'n League Cup-a minute 120 a khelhtir Sergio Aguero chu bench-ah dah a ni a, striker Gabriel Jesus chet fuh tawk loh zanah Sane-a'n tun season chhunga a goal riatna khungin Aguero leh Jesus te nen an goal khung zat a inang.

League hmahruaitu City manager Guardiola chuan, "David Silva-a'n hun ṭha vawi hnih a hlah a, Kevin de Bruyne pawhin hnai tak aṭangin a pet lut lo bawk. Football hi rinlawk thiam a harsa a, chak tur a chiang lo. Hun tawp dawn­a goal kan chhuah avangin point hnih kan hloh ṭep a ni, hamrik hnuhnung ber rik hma chu inthlahdah a thiang lo," tiin a sawi.

Sturridge-a goal 100

Liverpool manager Jurgen Klopp chuan Huddersfield laka si thum faia hnehna an chan chu Krismas ang maia hlimawm a nih thu a sawi. Tottenham laka goal li an chhuah hnuah Reds tlarhnung a phui bakah an hmatawng an hriam.

Anfield-a inkhelah Daniel Sturridge chuan Liverpool tana a goal 100-an khungin Roberto Firmino leh Georginio Wijnaldum ten an belh bawk. Reds tan hian season duhawm hmang mek­tu Mohamed Salah chuan penalty a hlah thung.

Reds manager Klopp chuan, "Totten­ham nen kan inkhelh kha chu tun season chhunga kan game chhe ber a ni a, dan rual loha rawn thleng a ni. Tun ṭumah erawh - goal thum, point thum, clean sheet," tiin a ṭhianpa Huddersfield manager David Wagner laka hneh­na a chan chungchang a sawi.

Hei le Kolasinac

Arsenal defender thar Sead Kolasinac-a'n Swansea lakah an siphurh a sut a, Bosnia international hian Aaron Ram­sey goal khung tur a siam­sak bawk. Midfielder Ramsey hian Gunners tan goal 50 a khung tling chiah.

Premier League match 800 zet a naute kaihruai tawhtu Arsene Wenger chuan, "Goal kan phurh hmasak hnuah pawh kan tho chhuak leh thei tih kan lantir ta. Kan khelh danah ka lawm, ka naute an ṭangrualin an thawkrim em em a ni," a ti.

Gunners hian tun season chhungin Emirates Stadium-a an league match bikah hnehna an la chang vek a, inelna hrang hrangah match 13 hnehna chang zawn tawhin an khelmuala record an neih ṭhat ber ṭum an tawng mek a ni.