Armed Veng an champion

Mizoram Taekwondo Association hnuaia inelna lian leh ngaihhlut hawlh ber GIG Motors Taekwondo Fight League season hnihna chu Inrinni zan khan Electric Veng YMA Hall-ah khelh zawh a ni a, Armed Veng Warriors chuan Kolasib Fighters laklah 97-80 a hnehna changin nomawi an chawi.

Final match bikah hian Armed Veng hi round nga an inbeih chhungin round paliah ngawt an chungnung zawk a, season hmasa lama pahnihna ni tawh Kolasib hi final-ah an vanduai nawn a ni.

Armed Veng War­riors captain Johny Vanlal­ruatsanga chu Fighter of the Night atan a vawi hnih nan thlan a ni, kumin TFL chhungin Vanlalruatsanga chiah hi vawi khat aia tam he chawimawina dawng thei awmchhun a ni.

Champion Armed Vengin Rs 50,000 an dawng a, pahnihna Kola­sib kutah Rs 30,000 hlan a ni. Semifinal-a tla team pahnih - Ramhlun Sporting Club Fighters leh Zopa Goldsmith Chawnpuiin Rs 20,000 ve ve an dawng a, knockout round lut zo lo team pahnih - CMTC Hlimen Rollers leh ATA Electric Veng Fighters kutah Rs 10,000 ve ve hlan a ni thung.