Chanmari FC-in Police pawt ding

Mizoram Premier League chan­chinah season 6 tluka ngaih­nawm a la awm lo, round thum chauh khel tur a awm tawh nachungin semifinal khel tur zawnna boruak a sang a, relegate tur a la chiang lo.

Champion lai Chanmari FC-in Zirtawpni zan match pawimawh takah Mizoram Police 2-1 in an lehthal a, H. Vanlalthlanga hoten semifinal kawng zawh leh tawhin, Lalbiaksanga Colney kaihhruai Police erawh knockout stage khelh tuma an kal fawr lai takin pawh din an ni.

Police-in BS-a Colney hnuaiah match nga chhungin point 13 an hmu a, hneh loh an nei lo. Chan­mari FC lakah pawh Police hian F. Zosangliana goal hmangin minute 18-na lekah hma an hruai a, match ruk chhung a zawna chak hmel hmu tawh lo Thlanga hote talbuai hman mah se substitute MC Malsawmzuala hmangin chhan­chhuahin an awm.

Man of the match atana thlan Siaha tlangval MC-a hian freekick aṭanga goal a khung bakah a ball pet crossbar per chu Vanlalbiaa Chhangte-in chakna goal khung nan a hmang bawk.

Hmuhnawm

Chanmari FC-in an foreigner Em­manuel Chijioke chu bul an

ṭan­­tir a, Police lamin dam chian loh vangin forward chhuanvawr F. Lalrinpuia bench-ah an dah thung. Inkhel ṭan phat aṭangin a nung

ṭha nghal a, inrintawkna ngah zawk Police-in an ngam nghal hle.

Minute 18-naah Police left back C. Zomuanpuia freekick pet chu midfielder F. Zosangliana'n a tauh goal nalh hle. BS-a nauten pressure an pek ṭhat avangin Chanmari FC-in ball an inpe ṭha thei lo a, goal chance pawh an insiam thei lo.

Police-in goal dang khung belhna hun ṭha an ngah a, Lalbiakhlua ball pet kawh tak chu Chanmari keeper F. Lalmuanawma'n a dang hman a, Lalfakzuala freekick petin goal ban a pet per bakah box chhunga ball per chang fuhtu defender TC Vanlalhruaia'n hnai tak aṭangin a hlah bawk.

Police-in first half-ah goal khat lekin hma hruai mah se inkhel an thunun hneh avangin chak tura rinawm zawk an ni a, Chanmari hmuh tur an awm lo.

Police ngamtu Thlanga

Chanmari coach H. Vanlal­thlanga'n MPL-a Police vawi nga a hmachhawn tawhah hnehna a chang a, vawi ruk hnehna an chang theih nan halftime-ah pawh a naute a fuih ṭha tih a lang.

Veteran coach Thlanga hian Nigerian midfielder Emmanuel la chhuakin goal nawr turin Vanlalbiaa Chhangte a dah lut ngam a, nak­kuma ISL club Pune City zawm mai tur Jakob Vanlalhlimpuia aiah MC Malsawmzuala khelhna hun a siam sak bawk.

Khelmualah erawh a dang-lamna a lang mai lo a, Police bawk chu chance ṭha nei hmasa niin Biaktea'n a ṭhiante a pek loh vangin awlsam taka goal khung theihna tur hun ṭha an bawhpelh.

Minute 73-naah substitute MC-a'n inkhel lan dan thlak dang turin hla tak aṭangin freekick a pet lut a, Siaha tlangval goal hi Chanmari FC phurna petu a ni. Chanmari mipui thawm a rin hnuah Police an tla hniam a, Thlanga hote an ṭang thei sawt thung.

Minute 78-naah MC-a bawkin box pawn a-ṭanga petna hun a insiam hnuah kawh zetin a pet leh a, keeper VK Malsawma'n a khawih feih avangin crossbar per mah se a per let chu vengtu nei lo Mabiaa'n a pet goal chiang hle.

A tawp thlengin

Police-in Valpuia an luhtir nghal a, Chanmari an bet nawn. San­tosh Trophy-a Mizoram keeper Muanawma'n hna ngah a, Police forward Lalfakawma ball tauh chu goal ngei tura ngaih a nih hnuah a beng chhuak hman.

Amaherawhchu, Chanmari kee­per hian injury time-ah a ball man sual chu tiper lehin Valpuia'n penalty hlawh chhuah nan a hmang a, hun rei lote chhunga thutlukna siamtu referee thutlukna a dikin lang mah se replay-ah erawh Muanawma chet dan chu penalty chawina tham niin a lang lo.

Police tan Lalsangbera rawn pen chhuakin Dawrpui tlangval hian goal zawnah a pet lo a, hun a tawp nghal.

Result nghawng

Chanmari FC-in point thum an hlawh chhuah avangin pathum­naah an chho a, point 15 hmuin an hnuaia awm Bethlehem Veng­thlang FC nen an point hmuh zat a intluk. Mizoram Police-in an elpui laka point an hloh avangin point 14 an hmu a, semifinal khel pha lo chinah an awm.

Chanmari hian November 2 hian BVT an hmachhawn dawn a, semifinal lut tur zawnna inkhela ngaih theih a ni. Thlanga hote hian semifinal khel tur beiseina sang tak la nei Ramhlun North leh MPL ṭant irh aṭanga an elpui Dinthar FC an la hmachhawn dawn bawk.

Mizoram Police-in November 3 tlaiah Chanmari West an hmachhawn ang a, Dinthar FC leh Chhinga Veng FC an la hmachhawn dawn. BS-a hote hian league hmahruaitu hi nuamsa taka an hmachhawn duh a nih chuan an hnuaia awm West Warrior leh Maimawms te an hneh a ṭul ang.