Spain-ah Barca ngamtu an la awm lo

Zirtawpniah Catalonia hruaituten Spain lak ata zalenna an puang a, Spain sorkar chuan an ram lak aṭanga Catalan mipuite inlakhran an tumna chu dan hnuaiah dang tura theihtawp an chhuah tur thu an puang ve zui.

Khelmual chhunga Catalan club Barcelona dang tur erawhin Spanish club ṭha tawk an la awm rih lo - Inrinni zan khan Barca hian an mikhualna ramah Athletic Bilbao chu 2-0 in an hneh a, league match 10 an khelh tawha tlawm hmel an la hmuh loh chu an chhawm nung zel.

Messi bawk

Barcelona tana goal hmahruai khungtu chu tudang niloin Lionel Messi bawk a ni. Argentina captain hian Bilbao goalkeeper Kepa a tlan pel hnuah post pet per mah se a chance neih vawi hnihnaah erawh a hlah nawn tawh lo a, minute 36-naah goal hmahruai a khung.

Chawlhlawk hman a nih hnuah mualneitu Bilbao an ṭha zawk a, mah se an vanduai. Mualneitu team tan hian Raul Garcia chuan bar a tauh per a, striker chhuanvawr Aritz Aduriz chuan goal khungna remchang nei mah se Barca goalkeeper Marc-Andre ter Stegen khelh ṭhat zan a tawng a, a vanduai. Counter attack aṭangin Barca bawkin goal an khung chhunzawm a, first half-a bar pet pertu Paulinho chuan chakna nemnghehna goal a khung - goal luh hun hi injury time a nih avangin Bilbao tan chhanna hun a awm tawh lo.

An kal zel

Barcelona-in ngamtu an la tawng lo zel a, league match 10-ah vawi kua chakin vawi khat an khingpui an inhnehtawk pui. Ernesto Valverde naute hian league goal 28 zet an khung tawh a, goal thum chiah an la chhuah bawk - Bilbao boss hlui Valverde-a'n a club hlui a chhuahsan hnua a tlawh lehna hmasa ber inkhela an chak chhana tha thawhhlawk bera chhal ngam chu Ter-Stegen a ni.

German keeper hian ropui zetin Aduriz hun ṭha neih a dan sak a, kha goal kha lut ngat se chuan inkhel a danglam ngei ang. Bilbao-in an finishing tawih lo an tuarah a ngaih theih bawk a, Inigo Cordoba chuan penalty area aṭangin vawi hnih ngawt a pet out a, Raul Garcia lah a danglam lo. Chawlhlawk hman hnuah Aduriz-a'n hun ṭha dang a nei bawk a, Ter-Stegen bawkin a dang. Inaki Williams-a'n a hun ṭha neih a chhawr lohte kha an ui vawng vawng ang.

Messi faktu Valverde

Barcelona coach Ernesto Valverde chuan, "Post kha pet per lo ni se chuan Messi khan goal dang a khung ni mai tur. Mahse, khati chung pawh khan a la ropui tho a ni. Engtiklai pawhin danglamna a thlen thei a, a goal pawh kha goal ropui tak a ni. Khawvela player ṭha berin kan tan a khel hi kan vannei a ni," a ti.

Valverde chuan sawi chhunzawmin, "Athletic khan harsatna tam tak min siam sak a, hnehna kan chang thei kha ka lawm takzet. Zep loa sawi chuan an goal lama ball kan khawih ai mahin kan goal lama ball an khawih kha a tam zawk a, mah se kan tlarhnung ṭhat tawkzia kan pholang a ni," tiin a sawi.

Atletico an chelh

Atletico Madrid-in inelna hrang hranga match an khelh hnuhnung pasarihah vawi ruk chiah hnehna an la chang - Inrinni zan khan an mikhual Villarreal chu goal khat ve ve khungin an inhnehtawkpui a, Angel Correa goal hmahruai khung chu Carlos Bacca chuan a sut.

Atletico boss Diego Simeone erawh a zam phah lo. Argentine manager chuan, "A eng zawnga thil thlir zel duh mi ka ni a, tuna kan khelh anga kan khelh zel chuan hma kan sawn em em ang. Tun hnaia kan khelh dan thlir chuan zanin kan khel kha kan khelh ṭhat ber ṭum a ni hial ang. 1-0 a nihlai khan kan thuhnuaia game dah turin chance pawh kan nei a, kan chhawr lo mai mai a ni," tiin hma an sawn zel thu a sawi.

Inkhel Results
Deportivo Alavés 1 - 2 Valencia
Atlético Madrid 1 - 1 Villarreal
Athletic Club 0 - 2 Barcelona
Sevilla 2 - 1 Leganés