PSG chakna Edinson Cavani

Edinson Cavani goal hnih hmangin Paris St-Germain chuan Nice 3-0 in an sawp a, league hmahruaitu an nihna an sawhnghet zel. Inrinni zan Ligue 1 inkhel dangah Claudio Ranieri enkawl Nantes chu Dijon khelmualah 1-0 in an tlawm a, Italian manager Ranieri-a'n a enkawl hnua an chak loh vawi khatna a ni.

Zirtawpni zan inkhelah PSG hian hrem vangin pound maktaduai 200 man Neymar an chhawr thei lo a, Brazil captain awm loh niah hian goal khung kawngah harsatna an nei lo.

Uruguay striker Cavani-a'n minute thumna lekah goal hmahruai khungin chawlhlawk hmain an goal hnihna a khung leh bawk - Cavani goal khung pahnih hi winger Angel Di Maria siamsak ve ve a ni.

Season hmasa Ligue 1 top scorer Cavani hian tun season league match 10 a khelhah goal 11 a khung leh der tawh a, ani aia khung tam awm chhun chu AS Monaco striker rinrawl Radamel Falcao (13 goals) chiah a ni.

PSG an vul laiin Nice tan kum duhawm lo a nih chhunzawm zel, Dante-a'n an mahni lamah a tih luh ni hian tun season-a a vawi sarih nan an chak lo a, season hmasa pathumna ni thei team hi 14-naah an awm mek.

Inkhel dangah cham-pion lai AS Monaco chuan Keita Balde leh Thomas Lemar te goal hmangin Bordeaux 2-0 in an hneh a, point 25 hmuin an chungah point 29 hmutu PSG chiah an awm.

Inkhel Results
Paris St-Germain 3 - 0 Nice
Bordeaux 0 - 2 Monaco
Caen 1 - 0 Troyes
Dijon 1 - 0 Nantes
Guingamp 1 - 1 Amiens SC
Montpellier 0 - 1 Rennes
Strasbourg 2 - 2 Angers SCO