Formula 1 champion Hamilton

Lewis Hamilton chu car intlansiakna lian leh ngaihhlut ber Formula 1 champion a ni ta. Mercedes driver Hamilton hian tun season intlansiak vawi 18 neih tawhah point 331 a hmu, intlansiak hmabak pahnih la awm mah se driver dang tan umphak theih a ni tawh lo - Britain tlangval tan Formula 1 title palina chiah a ni.

Hamilton hian Formula 1 nomawi chawi hnem lamah Sebastian Vettel (4 titles) leh Alain Prost te a nihrual chiah a, vawi nga champion tawh Juan Manuel Fangio a hnaih tawh hle - khawvela champion hnem ber Michael Schumacher (7 titles) erawh an la hlat deuh.

Vanduaina karah
Pathianni zan khan Mexi­can Grand Prix tlan a ni a, championship lama hmahruaitu Hamilton tan champion turin hna a harsa tawh loa ngaih a ni. Championship table-a pahnihna ni lai Vetttel hi pakhatnaah thleng pawh ni se a sang panga zinga a thleng phak a nih chuan a champion dawn tho.

Mexico-ah beisei loh danin thil a thleng, pole position aṭanga bul ṭantu Vettel leh Hamilton te hi lap khatna lekah an intipalh a, Mercedes driver hi pit stop-ah a luh a ngai, a hnung ber aṭanga tha thawh thar lehin lap 69 an tlan zawh meuh chuan pakuana dinhmun a luah thei a, a elpui ber Vettel chu palinaah a thlen ve bawk avangin Hamilton tan pakuana nih a tawk.

Mercedes driver Hamilton hian lap 15 tlan hmabak an la neih laiin a team hnenah cham­pion ni tura a mamawh zat a zawt a, an chhanna chu, "I dinhmun ngaia i din khan Vettel tan chuan pahnihna nih a ngai," tia an chhan hnuah Hamilton chuan, "Thil theih loh a nih chu," tiin lap hmasa bera buaina a tawh pui Vettel chu pahnihna a nih phak a rin bik loh thuin a chhang zui a ni.

Ferrari an chuai
Formula 1 team hlun Fer­rari lamin season bul an ṭan fuh a, intlansiak hmasa paruk­ah Vettel chu vawi thum ngawt pakhatna niin driver cham­pionship lamah pawh hma­hruaitu a ni deuh reng bawk.

Europe-ah intlansiak an zo a, Asia lamah inelna neih chhunzawm a ni. Singapore-ah Vettel-a'n a hmasa ber aṭangin bul ṭan mah se a teammate Kimi Raikkonen nen intipalhin Ferrari driver pahnih te a vawi khat nan lap khatna pawh an tlan tluan thei lo.

Malaysia lamah pawh Fer­rari hian beisei an phak lo, engine buaina an neih avangin Vettel tan hnehna chan ngaihna a awm lo. Malaysian leh Japanese GP an tlan zawh meuh chuan Hamilton hian point 59 zetin hma a hruai fal san tawh a, US lamah Hamilton a chetfuh chhunzawm bawk avangin Ferrari tan dan ngaihna a awm tawh lo a ni.

Hamilton a lawm
Kum 32 mi Lewis Hamilton chuan, "Mexico hi khawvela Formula 1 fans awm ṭhatna ber a ni hialin ka hria, ka hlawh­tlinna min lawmpui tura rawn kalkhawm zawng zawngte chungah ka lawm hle. Tun hnai kum nga chhung chu season ṭha takin ka hmang tawh a, hlawhtlinna ka chan theih nana min puitu team leh ka chhungte chungah ka lawm hle," a ti.

Mexico GP a awlsam loh thu sawi zuiin Hamilton chuan, "Bul ka ṭan fuh a, kawng kawi pathumna a thil thleng kha chuan min barakhaihin thil a ti harsa zo tak vek a ni. Ka duh leh beisei ang intlansiak a ni lo, chutih rualin ka beidawng ve ngai lo tih lantirna hun ṭha tak a ni. Ka mamawh zat point hmu tur khan ka theihtawp ka chhuah a ni," tiin a sawi.