An ramah Federer a thiam ber

Switzerland fa chuam Roger Federer chuan Juan Martin Del Potro hnehin Swiss Indoors Open no­mawi chu a vawi riat nan a chawi a, ranking lamah world number 1 Rafael Nadal chu point 1,460 chiahin a phak tawh lo.

Pathianni zana final khelhah Federer hian 6-7 (5-7), 6-4, 6-3 in hneh­na a chang a, tun sea­son chhunga a nomawi pasarih­na chiah a ni. ATP regular season khar hmain Paris Masters khelh tur a la awm.

Tunkar chhunga khelh tur Paris Masters hi ranking point 1000 hmuh theihna tur a ni a, hard court-a khelh a nih vangin Nadal chu champion chiang sa a dah ngawt theih a ni bik lo. Mahse, Paris-ah Federer a inlan dawn lo a, ATP Finals bak khelh tur a awm tawh dawn loh avangin Nadal dinhmun a him sawt.

Kum 36 mi Federer chuan, "Kuminah ka inkhel hnem hle a, tunah chuan ka taksain chawlh a mamawh a ni. London-ah ṭha taka inkhelh theih ka duh a, season thar ka thlir a ngai bawk," tiin Basel-a nomawi a chawi hnuah a sawi.

Argentine tlangval Del Potro-a'n Stockholm lama hlawhtlinna a chan hnuah Swiss a pan a, world number 19 hian ATP Finals khelh phak ngei tumin thapui thawh mah se Federer lakah a vannei tawk lo.

Del Potro chuan, "Tun ang kum thleng pawhah Roger a la ṭha reng mai hi chu awih a harsa zawk. Ani ang hian rei tak inkhelh theih ka duh a, mahse beiseina chauh a la ni," tiin Federer a dah sang hle.