Manager thar Puel hnuaiah Foxes chak

Leicester City mana­ger thar Claude Puel chuan team thar a kaihhruaina hmasa berah manager nghet nei lo Everton chu 2-0 in an hneh. Pathianni zan Premier League inkhel dangah kaithar Brighton chu an mikhual Southampton nen 1-1 in an inhnehtawk ve bawk.

Craig Shakespeare thlaktu Puel-a'n Nilaini aṭangin Leicester a en­kawl ṭan chiah a, ni thum hnuah match a nei nghal. Foxes tan Jamie Vardy-a'n tun hnai a match nga chhunga a goal hmasa ber a khung bakah Everton defender Jonjoe Kenny tihsual zarah Demarai Gray chuan an goal hnihna a khung bawk.

Foxes hian an league match hnuhnung pahnihah point ruk an hmu a, season tir lam match pariat aṭanga an hmuh nen a inzat chiah - Shakespeare chhuah hnuah league match pahnih leh League Cup-ah hnehna an chang tawh.

Leicester City mana­ger thar Claude Puel chuan, "Player-te an ṭang­rual a, an thawhhona ṭha vang­in goal kan khung. Hun chanve hmalamah hna kan thawh ṭhat avang­in hun tawp lamah buai deuh mah ila kan him theih phah a ni," tiin a sawi.

Player lei nana sum hmang hnem Everton lamin an goal khung theih loh an la tuar zel, Foxes goal-ah khung tumin vawi 16 pet mah se target zawnah vawi hnih chiah a kal. Tun season league match bikah Toffees hian goal sarih chiah an la khung a, anni aia khung tlem chu Bournemouth (6 goals) leh Crystal Palace (4 goals) te chiah an ni.

Everton manager lai­lawk David Unsworth chuan, "Manager tin hian khelhdan phung leh duhdan an nei vek a, ka duhdana khel chhuak tur chuan training ground lamah hun ka mamawh a ni," tiin Ronald Koeman hnathawh chhunzawm chu a awlsam loh thu a sawi.