Italy-ah Chelsea leh Conte fiahna

Premier League champion Chelsea-in zanin dar 12:15 hian Stadio Olimpico-ah Roma an tlawh dawn a, Champions League group C hmahruaitu inchuhna a tih theih ang.

Europe-a chak hmel la hmu lo Atletico Madrid-in an khelmual Wanda Metro­po­litano-ah Qarabag FK an mikhual bawk ang. Spanish club Atletico hian match thum khelh aṭanga point hnih chiah an la hmuh avangin beiseina chhi nung turin Azerbaijan club lakah point thum hmuh ngei a ṭul tawh.

Chak a tawk

Chelsea-in point sarih an hmu tawh a, Roma (5 pts) an hneh chuan knockout stage an lut ang. Amaherawhchu Blues hi an mualah Roma nen hian 3-3 in an inhnehtawk.

Antonio Conte hote hian Italian club an draw hnuah league-ah Watford (4-2) leh Bournemouth (1-0) te an hneh bakah League Cup-ah Everton (2-1) an hneh bawk. Blues thiampuipa Eden Hazard a dam ṭha leh tawh a, Cherries an hneh ṭum hian goal awmchhun a khung.

Inhliam vanga season bul lama inlan tam tawk lo Belgian winger Hazard chuan, "Ka dam ṭha leh tawh a, training-naah pawh ka thawkrim a, ka inhliam chu thil hlui a ni tawh. Inkhel pawimawh tak kan hmachhawn dawn a, Watford leh Bournemouth kan hneh avangin inrintawkna kan neih belh a, Champions League leh league khel kawp turin kan inpeih a ni," tiin an inpeih thu a sawi.

Chelsea manager Conte lawmna belhchhah turin Danny Drinkwater pawh a dam ṭha tawh a, French midfielder N’Golo Kante pawh a ṭul dan a zirin chhawr theih a ni. Blues-in hliam vangin Victor Moses an la chhawr thei lo a, hei erawh chhuanlama hman tham a ni lo.

Roma lam hi

Chelsea ang thoin Roma-in kartawp inkhelah goal khat chauhin hnehna an chang a, Stephan El Shaarawy chuan Bologna lamah goal awmchhun a khung. Serie A inkhelah hian forward Gregoire Defrel leh right back Bruno Peres te chu inhliam vangin lakchhuah an ngai a, amaherawhchu an player pawi­mawh Edin Dzeko a dam ṭha.

Kum 30 mi Dzeko hian Manchester City tana a khelh laiin match 189-ah goal 72 a khung a, kum 2015 khan Italy panin season liam ta khan league-ah goal 29 a khung a, Ballon d'Or award dawng thei tur player 30 zingah a lang pha.

Roma forward Dzeko hian Bologna nen goal khung lo mah se Stamford Bridge-a point an hlawhchhuah theih nan goal hnih a khung. Roma coach Eusebio Di Francesco chuan, "Dzeko khan goal khungna tur a nei a, ka bulah chuan goal chu Chelsea nen kan inkhelh hun atan a nih thu min hrilh. Goal khung lo mah se a khelh danah ka lawm a, ball chan tumin khingpuite kha a chuh ṭha a ni," tiin an striker a fak.

Italian club tana hriat nuam tur chu kum 2008-a Chelsea an mikhual hnuhnun ber ṭumin 3-1 in an chak a, Blues hi Italy-a UEFA hnuaia inelna an hmachhawn hnuhnung pathumah an chak lo vek bawk.

Atletico dinhmun hi

Spanish club Atletico Ma­drid hi inelna ṭan hmaa knock­out stage lut tura beisei ni mah se match thum khelh tawhah an khingpui tur Qarabag FK nen chak hmel an la hmuh loh avangin an dinhmun a derthawng dun hle.

Azerbaijan-ah Atletico-in goal an khung thei lo a, zanina an khelh tur Wanda Metropolitano hi an mual thar a nih avangin Champions League match vawi hnih an khelhna tur chauh a ni a, an la tlangnel tawk lo.

Atletico hian La Liga-ah Villarreal nen an inhnehtawk a, league-ah chak loh la nei lo mah se vawi nga an khingpui an draw tawh avangin an record hi chhuan tur a ni lo.

Atletico Madrid coach Diego Simeone chuan, "Kan in­khelh thlir hian chance ṭhahnem tak kan insiam a, player-te hi mimal anga an khelh ṭhat bakah team angin kan che ṭha a, result ṭha kan neih lohna chu goal kan khung thei lo hi a ni. Kan mamawh chu vanneihna a ni a, tuna kan khelh dan ngai renga kan khelh theih chuan result a danglam ang," tiin vanneihna an mamawh thu a sawi.