Kiwis ngamtu India chak

Pathianni khan India chuan ODI series match hmuhnawm takah New Zealand chu run rukin an hneh a, series an la. India leh New Zealand hian Pathiannia an intawn hma hian series match hnih khelh tawhah vawi khat ve ve hnehna an chang a, match thumnaa chak zawkin series an lak dawn avangin boruak a sang hle.

India an bat hmasa zawk a, an che chhe lo. Opener Rohit Sharma chuan ball 138 lek a hmachhawnah run 147 a siam a, Virat Kohli chuan run 113 a siam bawk. Over 50 a zawh meuh chuan India-in run 337 an siam a, wicket ruk chiah an hloh - chak tur a chiang anga ngaih a ni.

Mahse, rin aiin Kiwis an che thei a, Colin Munro (75), captain Kane Williamson (64) leh Tom Latham (65)-te an chet ṭhat avangin over tawp berah chak tura an mamawh zat chu run 15 chiah a ni tawh.

India captain Virat Kohli-a'n thutlukna pawimawh a siam a, over tawp ber vawm turin Jasprit Bumrah a thlang. Indian pacer hian over tawp berah wicket khat lain run riat chiah a pe a, India-in hnehna an chang - New Zealand-in an tlin zat chu run 331 a ni a, wicket sarih an hloh.

Ram pahnih hian November 1 zan aṭangin Twenty20 series an khel lehnghal dawn a, series hi match thum tho khelh tur a ni.