Paris mawitu Srikanth

French Open Super Series bad­minton tourna­ment final-ah Kidambi Srikanth chuan minute 34 chhung leka Kento Nishimoto hnehin no­mawi a chawi. Indian shuttler zingah season khat chhunga Super Series title pali la thei hmasa ber a ni.

Pathianni zan khan Stade Pierre De Cou­bertin, Paris-ah Srikanth hian 21-14, 21-13 in hnehna a chang. London Olympic bronze medalist Saina Nehwal chuan kum 2010 khan Super Series title pathum a la tawh - Srikanth hian Saina record a rawn khum ta chiah.

Kum 24 mi Srikanth hian French Open hma chiah khan Denmark Open title a la tawh bawk a, badminton legend Lin Dan, Lee Chong Wei leh Chen Long te hnung zuiin chawlhkar zawna Super Series champion zawn thei player palina chiah a ni bawk.

World number 2 thar Srikanth chuan, "World number 1 nih hi ka tum ber a ni hran lo, ṭha taka kan khel a nih phawt chuan ranking hi chuan hma a sawn ve zel," tiin Denmark tlangval Viktor Axelsen pawhthlak chu a thil tum ber a nih loh thu a sawi.

Srikanth chuan sawi zawmin, "Kumin chhunga ka vanneihna em em chu rinkai ber ni chunga ka inlan lo hi a ni. Player ṭhenkhat tan chuan an nomawi humhim tura inlan a ngai a, pressure an neih ang kha ka tan chuan a awm ve lo a ni," a ti.

Hyderabad tlangval Srikanth hian hliam vang­in harsatna tawk ve tawh mah se a dam hnu­­ah dan rual loin a khel chhuak chho thei a, Indian badminton legend Prakash Padukone leh Pullela Gopichand te rualin Srikanth hming hi lamrik a ni ve zel tawh ang.