Vawiinah Thanzuala rawn thleng dawn

6th Sudama Veteran Badminton Tournament, Chandigarh-a champion Lalthanzuala chuan vawiin hian Mizoram a rawn thleng ang.

Mizoram Police BC player Than­zuala hi Pathianni khan Sudama Veteran Badminton Tournament-a kum 50 chung­lam singles hmanga inelnaah pakhatna a ni a, final-ah Punjab shuttler Ram Lakhan chu 20-22, 21-14, 21-16 in a hneh.

Chanmari West pachal Thanzuala hian 2017 BWF World Senior Cham­pionship-ah quarterfinal a thleng a, 2017 National Championship-ah semifinal a thleng bawk. Sudama Veteran Badminton Tournament-ah Thanzuala hian champion turin Jammu & Kashmir player Vi­vek Singh (21-6, 21-2), Rajasthan shuttler Kamal Dalal (21-5, 21-9) leh Chandigarh player L. Joyty Sharma (21-5, 21-10) te hnehin semifinal a lut.

Final thleng turin Thanzuala'n seeded number 3 Vibor Shuarupu, Haryana mi chu tum lehin 16-21, 21-19, 21-8 in a hneh a, champion tura a hneh hi seeded number 1 Ram Lakhan a ni. Tun ṭum inelnaah hian Thanzuala bakah Mizo pathum K. Ramzauva (50+ MD) , Lalmuanawma (35+ MS) leh Ponty Lalramtluangi (35+WS) te an tel a; Muanawma hian final thleng mah se national champion vawi li ni tawh Abinsiam Gupta lakah a chak lo.

October 30, Vanglaini chhuakah Thanzuala hming hi Thangliana tiha tarlan a ni a, ziah sual palh a ni.