Cristiano Ronaldo a chuai?

Girona khelmualah 2-1 in Real Madrid an tlawm a, Cristiano Ronaldo hmuh tur a awm lo - Portugal captain hi khelmualah a inlan lo a ni lo a, a team tan a langsar thei lo a ni zawk.

La Liga kai thar Girona-in nomawi liantham chawi an la nei lo a, an squad pumpui hlut zawng pawh pound maktaduai 37-a ni. Real Madrid-in major trophy an chawi tawh zat chu 85 a ni a, an squad hlut zawng pawh pound maktaduai 657 a ni. Mahse, Pathianni zanah football mawina a lang a, mipui 13,500 lenna stadium-a Real mikhualtu Girona-in 'star' rual awmkhawmna Spanish champion an hneh.

Real an mualpho

Inkhel ṭan aṭanga minute 12-na lekah Real Madrid-in goal hmahruai an khung a, goal khungtu hi Isco niin hnai set sawt aṭangin a pet lut. Team pahnih dinhmun leh squad thlirin Real-in goal tam zawk an khung ngei a rinawm a, beisei ang erawhin thil a kal lo - Real-in goal dang an khung tawh lo.

Chawlhlawk hman a nih hnuah Girona-in an si phurh an sut a, Middlesbrough striker hlui Cristhian Stuani chuan 'cool' zetin an si phurh sutna goal a khung. Real an insiamṭha hman lo, Girona-in an si phurh sutna goal an khung aṭanga minute li hnu lawkah goal dang an khung lehnghal a, midfielder Portu chuan back-heel hmangin a khung. Real-in a chhanletna tur an nei lo a, Girona an chak.

Catalan Rorelna?

Kar hmasa Zirtawpniah Catalonia sorkarin Spain lakah zalenna a puang tawh a, Inrinni zanah a lawm nan Catalan club Barcelona an chak tawh. Pathianni zanah Catalan club bawk Girona an inlar a, an ngam loh tur chiangsaa ngaih Real Madrid lakah hnehna an chang. Politics rorelnaah Catalonia-in Spain an ngam lo a, football khelmualah erawh Spain aiin Catalonia an chungnung rih.

Kum 1930-a din tawh Girona hian vannei takin hnehna an chang a ni mai lo a, khelmual chhungah Real nen an inngam tawk hle. Goal hnih an khung bakah hian Manchester City aṭanga loan-a an hawh full-back Pablo Maffeo leh goal khungtu Portu te chuan woodwork an tih per ve ve a, a tawi zawnga sawi chuan Real-in si tam an phur lo hi an vannei - Girona player tam zawk hi loan leh a thlawna lakluh an ni.

Khawiah nge Ronaldo?

Season ṭan tirah Cristiano Ronaldo chu match li atan hrem a ni a, league lama beisei anga an khelhchhuah loh pawhin "Ronaldo kir hunah" tih chu Real ṭantute inhnemna a ni. Mahse, Portuguese forward a lo kir ta ngei a, amah beseitute beiseina a la chhanglet thei lo a, season dang zawnga 'Ronaldo' ang kha hmuh tur a la awm lo - tun season-ah league match ruk khel tawhin goal khat chiah a khung.

Best FIFA Men's Player hi Girona lakah khel chhe hulhuala chhuah chi erawh a ni hran lo. Isco goal khung khan Ronaldo ke aṭanga chhuak a ni a, goal-a shot chu Girona goalkeeper Yassine Bounou chuan lo dang perin a per lehlam changtu Isco chuan goal-ah a chantir.

Zidane a zam lo

Real Madroid-in an elpui Barcelona chu match 10 khelh tawhah point riat ngawtin an thlau mek a, Real boss Zinedine Zidane erawh a zam phah lo. French manager chuan, "Kan insiamṭha thuai ang tih ka chiang a, team dang pawh an la chesual ve dawn a ni. Rin loh takin point thum kan hloh a, mah se La Liga nomawi chawi kan duh," a ti.

Zidane chuan sawi chhunzawmin, "Kan khel chhe viauah ka ngai lo. Ka player-te zawng zawngin an theihtawp an chhuah vek. Tunah chuan kan haw ang a, hahdam takin kan awm phawt ang. Ka player-te hian La Liga nomawi chawi duhna thinlung an la nei reng a ni," tiin a naute an la beidawn loh thu a sawi.

Inkhel Chhehvel

• Real-in kum 2008-a Almeria an ngam loh hnuah La Liga kai thar 58 an hmachhawn a, Girona hi an tlawm lehna hmasa ber a ni.

• Real hian khualmualah league match 13 chhung chu a zawnin hnehna an chang tawh a, Girona laka an tlawm takah chuan Europe-a league sang panga zinga record nei ṭha ber an nihna chu tihtawi sakin an awm ta rih.

• Real-in Zidane-a hnuaiah goal an khung hmasak hnuah vawi thum tlawm hmel an hmu tawh a, Girona hma hian Sevilla leh Barcelona lakah an lo chesual tawh.