Ronaldo tel loin United-in Stamford Bridge tlawh dawn
Manchester United-in kar laihawlah Tottenham Hotspur an hneh a, Erik ten Hag-a hoten an elpui club dang Liverpool leh Arsenal te an hneh tawh bawk. Antonio Conte, Jurgen Klopp leh Mikel Arteta hote hnehtu Man United phur viau mah se Cristiano Ronaldo-a'n kawhmawh a bawl a, an hrem.
Zanin dar 10:00 hian Man United-in Ronaldo tel loin Stamford Bridge an tlawh dawn a, Graham Potter-a kaihhruai Chelsea nena an inkhel tur hian ngaihven a hlawh a, a hmuhhnawm bawk ang.
Ronaldo a puitling
Man United leh Newcastle United an inhnehtawk ṭumin Ronaldo an thlak a, Portugal captain hi a lungawi lo. Tottenham nena an inkhelh ṭumin Ronaldo chu bench aṭanga luh duh loin hun tawp hma hretin a chhuak tau. Nimin tlai khan Erik Ten Hag-a'n Ronaldo-a'n luh a duh loh thu a sawi chiang.
Dutch manager Ten Hag chuan Spurs laka an chak an lawm zawh hnuah Ronaldo chungchang a ngaihtuah tur thu a sawi a, Ningani zan khan Man United-in Chelsea an hmachhawn hunah Ronaldo tel loh tur thu thuchhuah an siam.
Ronaldo pawhin thuchhuah a rawn siam ve lehnghal a, khawvel player ropui ber zinga mi hian a thuchhuahah puitlinna a rawn pholang. Man United legend Ronaldo chuan, "Naupang zawkte entawn tura chet hi ka duh dan a ni a, amaherawhchu a theih reng lo. A chang chuan a hun laia thin thawk thutna te hian kan ṭhatna ber a hai chhuak ṭhin," tiin a sawi.
Ronaldo hian team ṭhatna tura theihtawp a chhuah zui tur thu a sawi a, mamawh huna a inpeih thu a sawi langin Manchester United tana an ṭanrual leh tur thu a sawi bawk.
Casemiro a pawimawh
Man United tan manto taka an lakluh Casemiro-a'n khelhna hmun a chang tam a, Brazilian midfielder hi mamawh chhanna a ni chho ta. FIFA World Cup-ah pawh champion rinkai ni pha Brazil tan Casemiro leh Fred ten bul an ṭan dun fo a, Premier League-ah pawh rintlak tur an ni.
Hei chauh hi a ni lo, tlarhnungah Lisandro Martínez leh Raphael Varane te an inkawp rem bawk - tlarhma duhthusam ni chiah lo mah se Chelsea hmachhawn turin an inpeih.
Potter-a Chelsea
Chutihrualin Chelsea hi Graham Potter hnuaiah langsar vut si loin an tlo hle - tlawm an la nei lo. Champions League lamah Blues hian Milan ṭum hnih an hneh a, goal an chhuah lo.
Premier League-ah pawh Chelsea hian match hnuhnung pathumah goal an chhuah lo a, tlarhma hriam tawk lo Man United goal khung a harsa ang.
Chelsea hian goal khungtu bik an nei lo a, kil tin aṭangin goal an khung. League match hnuhnung paliah goal sarih an khung a, player paruk khung a ni. Chutihrualin London club hian goal khung theih vanga lar Pierre-Emerick Aubameyang an kawl a, Raheem Sterling hi ven loh a thiang lo - Man United tlarhnung tan hna a awm dawn.
A pawimawh
Team dinhmun thlirin Chelsea leh Man United inkhel tur hi a pawimawh hle. Potter-a hoten point 20 an hmu a, khelh zat inangah Ten Hag-a hoten point 19 an hmu thung.
Zanin inkhel tur hi Champions League khel tur zawnna ang zawngin a thlir thei a, chutihrualin Man City pawh an chesual ve thei tih a lan avangin champion tur zawnna pawh a ni ve thei bawk.