National Basketball League-ah Mizo telna che ṭha

India rama a vawi khat nan National Basketball League chu October 16 aṭang khan Kochi-ah khelh ṭan a ni a, first round bik hi October 20 khan khelh zawh a ni. Mizo tlangval Lalrina Renthlei leh Vanlalṭhazuala-te telna Kochi Tigers chu round 1-ah hian vawi li chakin vawi khat chiah an chak lo a, pakhatna an ni.

Round 2 hi October 26-30 chhung hian Jaipur-ah khelh a ni ang a, November thlaah state leh state basketball inelna vangin an awl ang. December 7-11, 2022 chhungin round 3 khelh a ni ang a, final round hi Bengaluru-ah December 11-15, 2022 chhungin an khel leh ang.

Inelnaah hian team paruk an tel a, Mizo telna Kochi Tigers hian point kua hmuin hmahruaitu an ni a; Chandigarh Warriors (8 pts ), Chennai Heat (8), Bengaluru Kings (8), Delhi Dribblers (6) leh Mumbai Titans (6) ten an dawt.

National Basketball League-ah India aiawha khel tawh leh India camp-a awm tawhte an tel. Tuikhuahtlang tlangval Lalrina Renthlei hian MSL nomawi vawi nga a chawi tawh a, MVP vawi thum a ni tawh. Bungkawn tlangval Vanlalṭhazuala hi Khatla TBL innghahna a ni thung.