Aston Villa-in Gerrard an ban

Aston Villa chuan Fulham laka an tlawm hnuin coach Steven Gerrard an ban a, Villa chief executive Christian Purslow chuan, "Board chuan tun kum chhunga kan result uluk taka kan zirchian hnuah he thutlukna hi kan siam ta a ni," a ti.

Ningani zan khan Villa hian khualmualah Fulham chu 3-0 in an ngam lo a, Fulham tan Harrison Reed, Aleksandar Mitrovic (penalty) leh Tyrone Mings (own goal) te chuan goal khat ṭheuh an khung.

Inkhelh zawhah Gerrard hian, "Theihtawpa bei ṭhintu ka ni a, chu chu ka thisena bet tlat a ni. Kawng dang kawhhmuh ka nih loh chuan a tawp thlengin ka bei dawn," a ti a, mahse, darkar khat hnuah Gerrard ban thu hriat a ni.

Craven Cottage-a inkhelah Villa fan-te chu Gerrard ban turin an au rual a, an duh an hmu ta - Stevie G hi tun season-a Premier League coach ban palina a ni a, ani hma hian Scott Parker (Bournemouth - August), Thomas Tuchel (Chelsea - September) leh Bruno Lage (Wolves - Ocotber) te chu ban an lo ni tawh.

Kum 42 mi Gerrard hian Liverpool Under-18 aṭanga a coaching career ṭanin, June, 2018 khan Scottish Premiership club Rangers enkawl hna a ṭan a, March 2021 khan kum 10 hnua a vawi khat nan Scottish Premiership nomawi a chawipui a, league-ah tlawm an nei lo.

November 2021 khan Dean Smith thlakin, Villa enkawl hna a ṭan a, hetihlai hian Rangers chu league-ah hma a hruaipui. Mahse, kum thum leh a chanve cham tura contract ziaktu hian Villa hi thla 11 chiah a enkawl hman a, match 40-ah vawi 13 chiah chakpuiin, vawi riat draw an nei a, vawi 19 an tlawm.

Villa chief Purslow chuan, "Steven kan lakluh khan hmasawn zel turin ruahmanna kan siam a, mahse, kan zavaia kan theihtawp kan chhuah chungin kan hlawhtling lo a ni," a ti.

Villa hian coach thar an lakluh thuai tur thu an sawi a, Tottenham Hotspur coach Mauricio Pochettino hming a ri ring hle.