Lewandowski-a'n goal 600 a khung tling ta

Robert Lewandowski chuan a career-a goal 600-na khungin Barcelona chu hnehna a chanpui a, Ningani zan khan an mikhual Villarreal chu 3-0 in an hneh.

Lewy hian a career-a a goal 600-na hmangin goal hmahruai a khung a, a goal 601-na a khung zui bawk - Ansu Fati chuan goal khat a belhchhah ve leh a, Nou Camp-ah hnehna hlado an chham.

Barcelona-in hnehna an chan avangin hmahruaitu Real Madrid chu point thum chauhin an thlau leh ta a, La Liga champion tum inum boruak a ngaihnawm zel.

Hmahruaitu Real hian zanin dar 12:30-ah Sevilla an mikhual dawn a, Atletico Madrid chuan Pathianni zan dar 7:45-ah Real Betis an lenchilh ang a, Barca-in Pathianni zan dar 12:30-ah Athletic Bilbao an mikhual bawk ang.

A hming Lewy
Champions League-a dinhmun ṭha lo leh El Clasico-a tlawm hlim Barcelona-in fan-te rilru na thawi dam nan chak an mamawh a, Nou Camp-a fans pungkhawmte hlim taka nuihtir hmasatu chu Lewandowski a ni.

Kum 34 mi striker hian Jordi Alba siamsak chu mawi zeta a virpui hnuah a pet a, goal hmahruai a khung - minute 31-na a ni. Barca fan-te hlim au thawm pawh a reh hman lo, minute li hnuah hlim authawm dangin a chhunzawm.

Lewy bawk kan hmu a, Gavi ball pek chu a insiamrem hnuah penalty box hrul aṭangin mawi zetin goal-ah a chantir a, tun season La Liga-a goal 11 a khungna chiah a ni - match 10 chiah a la khel.

Barca-in an duhtawk mai lo - minute 38-naah Fati a inlar a, Lionel Messi hak ṭhin, jersey number 10 hatu forward hian Villarreal defender buai nuai karah a khung a, hun tawp thlenga goal dang a luh loh avangin 3-0 in an chak.

Lewy sulhnu
Barca-in Inter Milan (3-3) leh Real (3-1) laka hnehna an chan zawh loh hnuin hnehna an chang ve leh ta a, nipui laia Bayern Munich aṭanga pound maktaduai 42.6-a an lakluh Lewy bawk chu player langsar a ni.

Lewy hian Barca tan match 14-ah goal 16 a khung tling ta a, assist vawi thum a nei bawk - kum 2000 hnua Lionel Messi leh Cristiano Ronaldo tih loha goal 600 khung tling thei hmasa ber a ni a, a ropui hle.

Polish striker hian ram tan match 134-ah goal 76 a khung a, an ram club Znicz Pruszkow (21 goals) leh Lech Poznan (41) tan a khung tam viau bawk - khawvel hriata hming a chher tak takna erawh Borussia Dortmund a ni a, German club tan match 186-ah goal 103 a khung.

Lewandowski ropuina ber chu Bayern Munich a ni a, Bundesliga club-ah hian nomawi chawi theih zawng zawng chawi kimin, match 375-ah goal 344 a khungsak.

October 20, Ningani Zan
Almeria 3 - 2 Girona
ALM: Léo Baptistão 13'; El Bilal Touré 17'; Adri Embarba 38'
GIR: Rodrigo Riquelme 47'; Cristhian Stuani 83' (P)
Osasuna 1 - 0 Espanyol
OSA: Ante Budimir 55'
Barcelona 3 - 0 Villarreal
BAR: Robert Lewandowski 31', 35'; Ansu Fati 38'