T20 World Cup tak tak ṭan a ni dawn ta ; Pathianni tlaiah India Vs Pakistan
World Cup a nih tawh chuan eng inelna pawh ni se a hlu tawh ṭhin a, cricket-ah pawh T20 World Cup hi a ṭum riatna tur chauh la ni mah se ngaihhlut a hlawh hle. Australia rama neih mek T20 World Cup hi October 16 aṭangin khelh ṭan ni a, amaherawhchchu group stage-ah hian team ṭha pariat an la inlan loh avangin a hlu tawk lo.
Vawiin aṭangin T20 World Cup tak tak ṭan a ni dawn ta a, Super 12 inkhel hmasa berah inelna thlengtu Australia leh New Zealand te vawiin chhun dar 12:30 hian an khel ang. Tlai dar 4:30-ah England leh Afghanistan te an inkhel zui dawn.
Khawvel cricket ngainatute en châk erawh Pathianni tlai dar 1:30-a India leh Pakistan inkhel tur hi a ni. Inkhel tur hian ngaihven a hlawh tih nemnghehna chu thla khat liam ta khan ticket hi hralh zawh a ni tawh a, inkhelhna tur hmun Melbourne Cricket Ground-ah hian entu 1,00,024 an leng.
Boruak a hot
India leh Pakistan a nih tawh chuan boruak a 'hot' tawh hrim hrim a, tun ṭumah pawh hian khelmual pawn lamah boruak ṭha lo a awm sa. India-in 2023 ODI Cricket World Cup an thleng dawn a, nakkumah vek hian Pakistan-in Asia Cup an thleng dawn.
BCCI secretary Jay Shah chuan neutral venue-a Asia Cup an khelh tur thu a sawi. Asian Cricket Council executive board thutluknaah chuan Pakistan hi inelna thlengtu tur an a ni. Amaherawhchu Jay Shah hi Asian Cricket Council-ah President a nih bawk avangin a thusawi hi en liam ngawt theih a ni lo.
Pakistan Cricket Board chairman Ramiz Raja chuan, "PCB pawhin thutlukna khauh zawk a siam ve a ṭul dawn. India rama World Cup khelh turah Pakistan a tel lo a nih chuan ICC leh ACC pawhin hamṭhatna tam tak an chân ve ang," tiin India rama World Cup khelh lohah a vau ve thung.
ICC leh ACC hnuai inelnaah chuan ram pahnih hi inkhel bawk mah se India leh Pakistan intlawh tawn lohna hi kum 10 a tling ta. Kum 2008 Asia Cup kha Men in Blue-in Asia Cup an tlawh hnuhnun ber a ni a, Shaheens pawhin kum 2012 hnuah India an rawn la tlawh leh lo.
Rinkai leh Rinkai
Asia Cup-ah khan India emaw Pakistan emaw hi champion ngei tura ngaih an ni a, mak takin Sri Lanka an champion ta thung. Chutihrualin Men in Blue leh Pakistan hi ṭum hnih an inhmachhawn hman tho.
India (148/5) in match hmasa berah Pakistan (147) chu wicket ngain an hneh a, Super 4-ah Shaheens (182/5) in Men in Blue (181/7) hi wicket nga thoin an hneh let. Inkhel pahnihah hian ṭhumvawra chak zawkin hnehna an chang ve ve a, bat hnuhnung zawk an dingchang ve ve.
Rohit Sharma hote hi World Cup khel turin an inpeih tawh a, an inpuahchahna match hnuhnung berah Australia chu 6 runs-in an hneh. Hemi hma hian India hian Australia leh South Africa te mikhualin series an la ve ve bawk.
Pakistan pawhin Bangladesh leh New Zealand te nen One-Off tournament an khel a, group stage-a final-ah Black Caps an hneh. Amaherawhchu World Cup puala warm up match-ah erawh England an hneh lo.
En châkawm
India batting line up hi champion pui theih tur khawpa ṭha a ni a, hming langsar Rohit Sharma leh Virat Kohli te awm mah se Suryakumar Yadav hi team inngahna tura ngaih a ni. Chutihrualin nomawi meuh chawi tur chuan bowler-te an chet ṭhat a ṭul dawn a, bowler ṭha mi Jasprit Bumrah a tel loh avangin India bowling lam dinhmun tur hriatthiam a har.
Pakistan erawh Shaheen Shah Afridi a dam leh tawh a, Naseem Shah te nen India batter-te tan harsatna an siam thei ang. Batting lamah captain Babar Azam chu hming langsar a ni a, chutihrualin Asia Cup-ah erawh a 'nil' der thung. India bowler tan Asia Cup-a che ṭha Mohammad Rizwan vawm hlum hma a pawimawh ang.
Super 12
Group 1: Afghanistan, Australia, England, New Zealand, Sri Lanka leh Ireland
Group 2: Bangladesh, India, Netherlands, Pakistan, South Africa leh Zimbabwe
Fixtures
Vawiin Inkhel Tur
Australia 12:30 PM New Zealand
England 4:30 PM Afghanistan
October 23, Pathianni
Sri Lanka 9:30 AM Ireland
India 1:30 PM Pakistan
October 24, Thawhṭanni
Bangladesh 9:30 AM Netherlands
South Africa 1:30 PM Zimbabwe
• Team 12 chu group pahnihah ṭhen an ni a, group khata mite hi vawi khat ṭheuh an inkhel kual ang.
• Group khat aṭangin a sang pahnihin semifinal an lut ang. Semifinal hi November 9-10, 2022-ah khelh tur a ni.
• Final hi November 13, Pathianni tlai dar 1:30-ah khelh a ni ang.