East Bengal-in NorthEast an hneh

Ningani zan khan Indian Super League-a chak la nei lo NorthEast United leh East Bengal an intawng a, Kolkata club-in 3-1 a hnehna changin point thum an hawn a, Highlander erawh match thumah chak an la nei lo.

Guwahati khawpuia inkhelah East Bengal tan Cleiton Silva, Charis Kyriakou leh Jordan O’Doherty ten goal khat ṭheuh an khung a, hun pek belha Highlander tana Matt Derbyshire-a goal khungin awmzia a nei phak lo.

NorthEast tan MPL-a kan hmuh tawh midfielder Emanuel Lalchhanchhuaha leh forward Rochharzela ten bul an ṭan a, full back Joe Zoherliana chu bench aṭanga luhtir a ni thung - East Bengal tan Durtlang defender Lalchungnunga leh Jerry Lalrinzuala te an khel tluan bawk.

Nizana Chennaiyin leh Goa inkhel result kan hre hman lo a, vawiin tlai dar 5:30-ah Lallianzuala Chhangte leh Lalengmawia (Apuia) te awmna Mumbai City-in Jamshedpur an mikhual dawn.

Jamshedpur tan defender Ricky Lallawm-awma leh Laldinliana Renthlei ten hmun pawimawh an chang phak a, Laldinpuia Pachuau a awm bawk.

Durand Cup top scorer Lianzuala'n khel ṭha ṭhin mah se ISL-ah goal a la khung lo a, "A lehpekah chuan a fuh tawh ang," tiin Vanglaini a hrilh - Mizo defender hmaah pet goal a tum dawn.

Zanin dar 7:30-a Hyderabad leh Bengaluru inkhel turah Hyderabad-ah goalkeeper Lalbiakhlua Jongte, midfielder Lalchungnunga Chhangte leh Mark Zothanpuia te an awm.

Pathianni zan dar 7:30-ah Mizo player pariat awmna Odisha chuan K. Lalṭhathanga (Puitea) khelhna Kerala Blasters an mikhual dawn bawk.

Odisha hian keeper Lalthuammawia Ralte, defender Lalhrezuala Sailung, Lalruatthara, midfielder Isaac Van-malsawma, Paul Ram-fangzauva, forward CVL Remtluanga, Isak Vanlalruatfela leh Jerry Mawia te an kawl.

October 20, Ningani Zan
NorthEast United 1 - 3 East Bengal
NEU: Cleiton Silva 11'; Charis Kyriakou 52'; Jordan O’Doherty
EAB: Matt Derbyshire 90+2'
Zanin Inkhel Tur
Mumbai City 5:30 PM Jamshedpur
Hyderabad 7:30 PM Bengaluru
October 23, Pathianni Zan
Odisha 7:30 PM Kerala Blasters