Arsenal an tling fel der

Europa League knockout stage khel turin Arsenal an tling fel der. Group A hmahruaitu an ni thei dawn em, tih erawh an nghah rih hret a la ngai dawn, tun season zet chu Mikel Arteta naute an che fuh chho hle.

Ningani zan Emirates Stadium-a inkhelah, midfielder Granit Xhaka chuan minute 70-naah goal awmchhun a khung, mikhual PSV Eindhoven lamin a chhanletna tur an nei lo - Dutch club hi pahnihnaah an awm chhunzawm.

Group hmahruaitu hian last 16 an lut nghal dawn, pahnihnna erawh tlang tho mah se round of 32 an lut dawn - Champions League group stage aṭanga tlate nen playoff an khel dawn tihna a ni, hmahruaitu ni chunga tlang theih a pawimawh hle.

Arteta chuan, "Knockout stage kan lut, kan thil tum hmasa chu a hlawhtling. Tunah chuan a pahnihna atana group hmahruaitu nih kan tum leh ang," a ti. Spanish manager hian PSV lakah Gabriel Jesus leh Bukayo Saka te bul a ṭantir bawk a, chak a tum hle tihna a ni.

Champion tur chuan khelh ṭhat vak loh nia chak theih a pawimawh, tun lai Arsenal dinhmun nen a inang hle. Arteta chuan, "Match thum chhung a zawnin 1-0 in kan chak, goal chhuah loh hi a lawmawm, goal tam zawk khung kan tum ang," a ti.

Premier League hmahruaitu hian hahchawlhna hun an nei vak dawn lo. Pathianni zan dar 6:30 hian Southampton an lenchilh zui leh nghal dawn; Saints lakah chuan a player neih ṭhat ber ber ten bul an ṭan rual leh thung ang.

Europa League-ah hian defender William Saliba leh Ben White te an hahchawl a, keeper Aaron Ramsdale pawh a inlan lo. World Cup hmain league bikah Saints, Nottingham Forest, Chelsea leh Wolves te an la tum dawn, hmahruaitu ni reng turin hun remchang an nei.