Santosh Trophy-ah Mizoram hmaah champion Kerala

AIFF chuan Santosh Trophy kalphung a thlak danglam a, zone-a kalpui tawh loin kum hmasa pathuma khelh dan aṭanga teha seeding mumal tak nen nimin tlai khan draw a nei - Mizoram chu group II-ah awmin champion lai Kerala an hmachhawn a ṭul dawn.

Group parukah ṭhen niin December-ah group stage hi khelh tur a ni a, group tina champion leh pahnihna zinga a tiṭha pathumin final round an lut ang. Railways leh Services chu final round-ah dah sa an ni a, tun season Santosh Trophy semi final leh final hi Saudi Arabia-a khelh turin AIFF chuan ruahmanna a siam.

Mizoram group-ah hian Kerala bakah Rajasthan, Bihar, Andhra Pradesh leh Jammu & Kashmir an awm.

Hmeichhe lam ve thung
Senior Women's Football Championship pawh Santosh Trophy anga kalpui a ni a, group-ah ṭhen niin Mizoram hmaah Maharashtra, Kerala, Pondicherry, Uttarakhand leh Chandighar an awm.

Hmeichhe lamah hian group tin champion bakah pahnihna zinga a tiṭha paliin final round an lut dawn a, Railways chu final round lut saa dah an ni - Mizoram hi inelna hnuhnung berah khan semi finalist an ni.