Mang ram, a tak ni si

Silly Point

India rama cricket thuneitu sang ber Board Of Control For Cricket in India (BCCI) inthlan chu harsatna lian tham awm loin an zo fel a, cricketer hlui Kaptan hmingthang Sourav Ganguly thlak turin World Cup winner Anglo Indian Roger Binny chu president thar a lo ni ta a ni.

Tin, Mizoram palai ngei mai, Cricket Association of Mizoram (CAM) lama General Secretary nilai Mamon Majumdar chu chuhtu awm loin Apex Council member-ah dah a ni. Mizorama leh Hmarchhak tana hmasawnna tam tak thlentu a ni dawn tih a chiang a, thil tam tak a lo thawh tawhte hre reng chungin, a aia nasa zawka a penna tur leh ko rit zawkah hian, duhsakna sang ber Indian Cricketers Association aiawhin ka hlan e.

Indo-Pak
Kumin zawng, a khat tawka Indo Pak buaipui kum a ni a. Thla hmasa lawk Asia Cup lamah ṭum hnih an inhmachhawn a, a pawimawh zawkah Shaheens an chak.

Tun Pathianni hian Melbourne lamah, ICC T20 World Cup a an inlan hmasak berah, India leh Pakistan an inkhel dawn. Super 12-ah chuan inkhel khal ber tura ngaih a ni.

Rohit Sharma leh a naute lam an pawl cham phei put dawn nge? Babar Azam a te Green Pakistan rawng a hring zual sauh sauh dawn le? A vuak lama thawh hlawk zawk zawk leh ṭhumvawr bikin kawng ro thui tak a su ang.

Mang ram
Hei kei pawh Kumpinu ram aṭangin, ka thil tihtur ang ang te tluang takin ka ti zel a. Cricket Administration leh Management lam ka zir tur leh hriat tur te, helam county lam aṭangin khual ṭha chhawnin min lo chhawng zel.

Zoram Cricket lama seng luh mai theih thil awlsam tak tak lah a bang lo. Chutihrual chuan lung pakhata sava pahnih vawm ang deuhin, English Premier League inkhel pathum ngawt en thei turin min lo buatsaih ve a. Zanin lam Stamford Bridge-ah kan ṭwhu ve vang thei tur te hi, tu dang vang ni loin, Mizo Chelsea Supports Club vang chauh a ni. Infiamna khawvel hi kan chawm bawk, kan hawp bawk hrih zel dawn a nih hi maw.

- K. Vanlalruata