Mizoram hmeichhe team-in Meghalaya hneh

Senior Women's T20 Trophy-ah Mizoram hmeichhe cricket team chuan hnehna an chang a, Meghalaya nen inkhelin wicket 8-in an chak.

Ningania Alur Cricket Stadium II-a inkhelah, Mizoramin vawm hmasak an thlang a. Meghalaya hi over 18 chhunga vawm out zoin run 91 an siamtir.

Mizoram tan leg spinner Lalnunsangi Ngurte a che ṭha a, wicket li lain Meghalaya middle-order insiamrem hman miah loin a siam. State pawn player Tarang Jha-in a tawp a khar ṭha a, wicket thum a la ve bawk.

Stump out vawi hnih nei wicketkeeper Lalremruati Pautu a ṭangkai a. Meghalaya innings-a run siam hnem ber wicket hi Lalhriatpuii'n a la ve thung.

Bat hmangin Mizoram tan Tarang Jha a che ṭha a, run 57 siamin a tawp thleng a dam. Lalrinfeli'n run 14 siamin tualchhung batter dang pahnihten an dinpui hman bawk a. Over 16.3-ah harsatna lian nei loin Mizoramin run 95 an siam thei a, hnehna an chan theih phah.

Kumin aṭangin BCCI hnuaia inelna kalphung thlak danglam a ni a, team nem zawka ngaihte dahna ṭhin Plate Group awm tawh loin team tel zawng zawng dah pawlh an ni tawh.

Mizoram hi Group A-ah awmin team ṭha Uttar Pradesh, Andhra Pradesh tihte nen an inel tawh. Match khat khelh hmabak an la nei a, vawiin hian team ṭha dang Odisha nen an inkhel leh ang.