MotoGP champion tur la chiang lo

Bike intlansiakna sang ber MotoGP season kal laiah champion tur a la chiang lo, intlansiak pahnih chauh a awm tawh si. Hun rei tak hmahruaitu Fabio Quartararo-a'n a hmahruaina Francesco Bagnaia lakah a hloh, inelna a tingaihnawm zual hle.

Pathianni chawhnu dar 12:30 hian Malaysian Grand Prix an tlan leh dawn, champion tum tan chetsual a thiang tawh lo. Season kharna chu November 6 hian Valencia-ah an nei thung ang.

Ducati rider Bagnaia chuan, "Engmah sawi lawk theih a ni lo, ka hmahruaina hi kawng kawi pakhat lekah ka hloh nghal thei," tiin dinhmun ṭha a la nih bik loh thu a sawi a, tun kar tawpah theihtawp chhuah a tum thu a sawi ve bawk.

Yamaha bike khalhtu Quartararo pawhin insiamṭhat a tum thu a sawi, intlansiaka tlan tluan thei lo nih a pawi a, champion tur chuan tlan tluan thei nih ringawt pawh a tawk tawh lo, hnehna changtu nih a ngai dawn.