Dinthar hmalam Aizawl FC kutah

Aizawl FC-in zanin dar 8:00-ah Mizoram Premier League champion hmasa ber Dinthar FC an hmachhawn dawn.

I League champion AFC hian Maimawms hi an hneh a nih chuan semifinal an lut thei dawn a, Dinthar FC erawh Mi­zo­ram league sang bera an dinhmun a derthawng sawt ang.

Dinthar FC hian Aizawl FC lakah record an nei ṭha a, MPL-a vawi 11 an inhma­chhawn tawhah vawi li chakin AFC hi vawi hnih chiah an la chak.

Hei erawh hriat a ṭha, Aizawl FC hian Portuguese coach Paulo Meneses hnuaia Dinthar FC an hmachhawn hmasak berah 3-0 in an hneh a, phase 2-ah hneh loh an la neih loh bawk avangin inrintawkna an ngah khawp ang.

Portuguese coach Paulo Meneses chuan, "Kan inkhelh apiangin I League club khelh danin kan khel tur a ni a, chu chu Aizawl FC-in kalphungah kan neih a ṭul a ni. Hei hi kan chhawm nun reng loh chuan nakinah kan tan a la harsa ang. Dinthar FC hi team ṭha tak an ni a, point thum hmu tur chuan player-tinin an tih tur ṭheuh an tih a ngai a ni," tiin inelna a la thutak hle.

Aizawl FC-in defender Ramdinsanga chu hliam vangin an chhawr thei dawn lo a, Chanmari tlangval Lalhriat­renga (Achia) a chhawr theih tawh thung ang.

Dinthar FC-in point riat chiah an la hmu a, an chung chiaha awm Chanmari West pha turin point li an la mamawh. Maimawms hi an chesual a nih chuan tualchhung football-a club tlo ber zinga mi hian MPL khelh zel beiseina an nei tlem tawh hle ang.

Maimawms boss Vanlal­rova hian a player a rem thiam a ṭul dawn a, Aizawl FC kal vung lai taka hmachhawn tur an nih avangin fing taka an khelh a ngai dawn a ni.