Semfinal-ah Police nge West Warrior?

Mizoram Police leh Chanmari West ten Mizoram Premier League Season 6-ah semifinal an la lut thei ve ve a, vawiin tlai dar 3:00-a an inkhel tur hian nghawng lian tak a nei ang.

Lalbiaksanga Colney en­kawlna hnuaiah Police-in hneh loh an tawng ta a, Chanmari FC laka point an hmuh loh avangin semifinal khel thei chinah an awm pha lo. West Warrior erawhin coach thar H. Lalnunzira hnuaiah Chanmari FC hneh nghal mah se an match hnihnaah Ramhlun North lakah an mualpho.

West Warrior coach Zirtea chuan, "Kei ni chuan semifinal lam kan thlir lo a, Police hneh hi kan tum hmasak ber a ni. Chumi tur chuan kan thawkrim a, point hlawh chhuah ngei kan tum a ni," tiin Vanglaini a hrilh. West Warrior hian Police an hneh loh chuan semifinal beiseina a tawp ang.

Chanmari West tlangval Zirtea hian an veng mipui ṭawiawmna a beisei a, an foreign forward Ben­jamin Cooper pawhin bul a ṭan tur thu a sawi bawk.

Police coach BS-a Colney chuan, "Chanmari kan hneh loh khan goal chance kan hlah hnem a, ṭhiante pek mai turah kan pe lo. Chanmari West lakah chuan chet sual a thiang tawh lo a, chak ngei tumin kan khel ang," tiin chak a tum thu a sawi. Armed Veng pa BS-a chuan goal li khung tawh striker F. Lalrinpuia chu inkhel bul ṭan tura a dam tawh thu a sawi tel bawk.