A ṭan nan CFC vs BVT

Mizoram Premier League Season 6 round 12 khelh hun sawn hma a ni a, vawiin hian match li khelh tur a ni. Chanmari FC leh Bethlehem Veng­thlang FC ten inkhel bul ṭanna turin chhun dar 12:30-ah match hmasa ber an khel ang.

Team pahnih hian point 15 ve ve an hmu a, an intum hmasak zawkin goal awm loin an inhnehtawk a, hei vang hian tun dinhmuna goal difference nei ṭha zawk Chanmari FC chu dah sang zawk a ni.

Zanina an inkhelh tur hi Chanmari home a nih dawn avangin goal awma an inhnehtawk nawn a nih chuan BVT dinhmun a ṭha zawk dawn a, H. Vanlalthlanga hoten an dinhmun hi an hriat chian a ṭul hle.

BVT FC coach lailawk Benjamin Lalhriatpuia hnuaiah Dinthar FC an hneh nghal a, phase 2-a an chak vawi khatna chauh a ni. BVT hian de­fen­der pahnih David Lal­chhuanawma leh Ben­jamin Zothanmawia bakah winger Isaac Lalruatpuia te an la thar a, MPL-a tawnhriat nei vek an nih avangin squad tih chhahna ṭha tak niin a lang.

Salem Veng tlangval David-a hi season ṭan­tirha Chanmari FC tana khel a ni a, BVT tan a inlan a nih chuan a club hlui a hmachhawn nghal thei ang.

Chanmari FC-in BVT aṭangin B. Zoramthara an lalut ve bawk a, College Veng tlangval hian a club hlui hmachhawn nghal hi a châk khawp ang.