Ramhlun North leh Chhinga Veng hi...

Mizoram Premier League Season 6 hmahruaitu chu Chhinga Veng FC ni mah se Ramhlun North ṭantute au hla chu, "Chhinga Vengin min hneh ngai lo," tih a ni.

Chhingcows leh Ramhlun North te hi vawiin tlai dar 5:30 hian Lammualah an inkhel dawn. Phase 1-ah 3-3 in an inhnehtawk tawh a, Lalsangzuala Hmar hote hi hun tawp dawna a sûttu zawk an nih avangin hun tawp hamrik hnuah pawh boruak a sang hle.

Samson Ramengmawia hote hian an match hnuhnung berah Chanmari West FC 3-0 in an hneh a, hemi ṭuma goal mawi khungtu Harry Delona chu a visa a tawp avangin a inlan thei dawn lo. Ramhlun North-in Liberian midfielder thlak nan Calcutta Customs Club aṭangin John Kweku Ampong an lalut nghal.

Ramhlun North manager K. Lalenghluna (Maenga) chuan, "John hi a khel la hmu lo mah ila, min zawn saktuten MPL-a khel tura ṭha tura an ngaih a ni a, a man aṭanga thlir pawhin Harry aia ṭha tura ngaih a ni," tiin an player thar chungchang a sawi.

Aizawl DFA First Division aṭang tawhin Chhinga Veng hian Ramhlun North hi an la hneh ngai lo a, zanina an hneh thei a nih chuan Aizawl FC-in an record an tihtawp sak avanga an rilru na hi a chhawk theih beisei a ni.

Chhingcows hian tun season-ah I League club chiah an la hneh lo a, inringtawk taka knockout stage an khelh theih nan Ramhlun North lakah result ṭha an beisei ang.

Chhinga Veng tana hriat nuam lo erawh an club goal khung khawl Malsawmfela'n phase 2 (match li)-ah goal a khung tawh lo.