Club pahnih intawn hmasakah City 2-1 in an chak
Premier League-ah Manchester City-in tlawm hmel hmu loin hma an hruai mek a, match 10 an khel tawh. Serie A hmahruaitu chu Napoli an ni a, match 11 an khelh tawhah tlawm hmel an hmu bik lo. An ram league ve vea team hmuhnawm pahnih hi Champions League group match khel turin zanin dar 1:15-ah an intawng dawn a, inkhel hmuhnawm a beisei ngam.
Team pahnih hi Etihad Stadium-ah an lo intawng tawh a, inkhel hmuhnawm takah City -in 2-1 in hnehna an chang. Inkhelh zawhah Pep Guardiola-a'n, "Team ropui tak lakah hnehna kan chang a, ṭha chungchuang taka khel ni lo ila chu hnehna kan chang kher lo ang. Team ka hmachhawn tawh zinga ṭha ber pawl an ni a, kan hneh thei hi ka inchhung a ni," tiin a sawi a, zaninah pawh game hautak hmachhawn turin a inbuatsaih ang.
City vanglai
Pep Guardiola enkawlna hnuaiah Manchester City-in an vanglai tak tak an tawng mek a, Premier League-ah City ngam thei an la awm lo. Pep-a naute hian league match 10 an khelh tawhah vawi kua hnehna changin vawi khat an khingpui an inhnehtawkpui a, inelna hrang hrangah match 13 chhung a zawnin an chak tawh!
Premier League-ah ringawt goal 35 an khung tawh a, an lama lut zat chu goal ruk chauh a ni - he team hian goal khung turin theihna an nei tih a chiang a, goal ven an thiam tih a lang bawk. Napoli tan ṭum dang zawng aia khelh ṭhat lehzual a ṭul ang. City tan league match hnuhnung bera West Brom hmachhawn lo Sergio Aguero-a'n inkhel bul a ṭan a beiseiawm a, Kevin De Bruyne sawi hmaih a thiang lo.
Napoli an nep lo
City-in tun hnaia an khelh ṭhat an chhuang a nih chuan an chesual ang - Napoli an nep bik lo. Serie A match 11 an khelh tawhah vawi 10 hnehna an chang a, vawi khat chiah an khingpui an inhnehtawkpui. Inter Milan, Juventus leh AS Roma chunga leng mek hi club chhia an ni thei lo a, City tan Etihad-ah aiin game a harsa dawn tih a chiang.
Napoli hi City ang thoa goal khung nuam ti an ni a, league goal 32 tehmeuh khung tawhin goal riat chiah an la chhuah - inelna hrang hranga match 16 khela goal 12 khung tawhtu Dries Mertens chu an innghahna tur a ni leh ang.
Boruak sang
Manchester khawpuia club pahnih inhmachhawn ṭumin buaina a chhuak tawh a, buaina a chhuah leh venthawn thil thuah Napoli hotute chuan stadium chhungah kawnghren 'hren' luh emaw ken luh an phal dawn lo! Manchester khawpuia club pahnih intawn ṭuma buaina chhuakah club pahnih fans-in kawnghren an thawh a, hliam tuar an awm nual - Napoli fan pakhat phei chu thla nga chhung jail tang tura hrem a ni!
Napoli-in tualchhung football-a ro an rel chungin Europe-ah beisei an phak lo a, match thum an khelh tawhah vawi khat chiah hnehna an la chang - zaninah hnehna la chang vek City an ngam lo nawn a, zanin dar 1:15 veka inkhel tur vawi hnih chak tawh Shakhtar Donetsk-in Feyenoord an ngam bawk chuan last 16 luh beiseina a tlem sawt ang.