FIFA U17 World Cup Football khawmpui a ṭiak ta

October 6-a khelh ṭan, FIFA Under 17 World Cup, India-in a thlen chu a ṭiak ta a, nomawi chawi chungin England chuan tun hma lama an awp tawh India an hawsan. Kha inelna kha kum 2013 hnua Asia-in U17 World Cup a thlen leh hmasak ber a ni a, India-in FIFA tournament a thlen hmasak ber a ni bawk.

Khawmualpui paruk aṭangin ram 24-in he inelna hi an hmachhawn a, khawvela rawlthar thiam rual an fuankhawm. Ram 23 hi qualifier leh an khawmualpuia U16/17 championship-a an chet ṭhat dan a zira in petkai an ni a, India erawh a thlengtu nih vanga kheltu kan ni thung - eng level-ah pawh India-in World Cup a khelh hmasak ber a ni.

Inelna chu

Inelna hi India rama khawpui paruk Kolkata, Kochi, New Delhi, Mumbai, Guwahati leh Margao (Goa) ten an thleng a, final chu Salt Lake Stadium, Kolkata-ah khelh a ni. Group A - F ah team 24 hi group pakhata team pali zel awmin ṭhen hran an ni a, group tina pakhatna leh pahnihna chu last 16 inpetkaiin pathumna zinga a ti ṭha pali an inpetkai bawk.

Round of 16 lut pha lo team pariat zingah India an tel tihna a ni a, India bakah hian group stage aṭanga tla team hi Guinea, New Zealand, Costa Rica, Turkey, Chile, New Caledonia leh North Korea te an ni. India rama World Cup hi a hmunah mi 1,347,133 in an en a, U17 World Cup-in a hmuna entu a neih tam ber ṭum a ni - record dinglai chu U17 World Cup hmasa ber 1985-a China-in mipui 1,230,976 hmanga an lo siam tawh kha a ni.

Goal a lut hnem

October 6-28 a U17 World Cup khelh a nih chhungin match 52 khelh a ni a, goal 183 ngawt a lut. Hei hi chawhrualin match tina goal 3.52 lut ang zel a ni a, goal lut hi a tam hle. Goal 183-a goal 70 ngawt hi chu semifinal khel pha chin - Mali, Brazil, Spain leh England te khung a ni. Goal khung hnem ber England-in goal 23 an khung a, chhuah hnem ber Honduras chuan goal 14 an chhuah thung.

He inelnaah hian goal khung miah lo ram pahnih chiah an awm a, Chile leh North Korea an ni. India-in goal khat an thawh ve a, India goal neihchhun hi Manipur rawlthar Jeakson Singh Thounaojam khung niin Colombia laka 2-1 a an tlawm ṭuma a khung a ni a, India-in FIFA tournament-a goal a khung hmasak ber a ni.

Champion thlirna

England-in final an khelh thlengin match sarih an khel a, goal 23 an khung a, goal ruk chiah an chhuah. England tan tournament top scorer Rhian Brewster chuan goal riat ngawt a khung a, Young Lions aṭanga amah hnaih bertu Jadon Sancho chuan goal thum a khung. England-in 'team game' an khel tih chu an ṭhat chhana sawi a ni a, chumi tichiangtu chu an goal 23 hi player pakua khung a ni.

Three Lions-in match sarih an khelhah minute 120 chhunga goal khung loh vawi khat chiah an nei a, chu chu last 16-a Japan an tum kha a ni. Japan nen hian goal khung loa an inhnehtawk hnuah penalty hmanga chak zawk zawn a ni a, 5-3 in hnehna an chang.

Foden a thiam ber

Khawvela rawlthar thiam rual ten India-ah an pungkhawm a, an zinga thiam bera thlan chu England champion puitu Phil Foden a ni. Manchester City-a kar khata £4,000 (Rs. 341,480.45) hlawhtu midfielder hian England tan match sarih khelin khelmuala a hun hman zat hi minute 550 a ni a, goal thum a khung a, assist vawi khat a nei.

Foden hi statistic aṭang ringawta tehin a thiamna a lang lo. Goal thum leh assist khat piah lamah hian team tana a ṭangkaizia chu England inkhel entuten an hria ang - City boss Pep Guardiola chuan chhawr ṭangkai dan tur a ngaihtuah ṭan mek tawh niin khawthlang media te chuan an tarlang - Foden hnuaiah hian Sergio Gomez (Spain) leh Rhian Brewster (England) an awm.

Brewster = goal

England-in World Cup nomawi an chawi a, player ṭha bera thlan chu Foden a ni a, goal khung hnem ber pawh English striker Rhian Brewster a ni. Liverpool rawlthar duhawm hian quarterfinal khelh hma kha chuan goal khat bak a khung lo a, mahse inelna a sang tawlh tawlh a, a theihna a lang chiang tawlh tawlh.

Reds rawlthar hian quarterfinal leh semifinal-ah a zawnin hattrick a siam a, final-a Spain an hnehna inkhelah England beiseina siam turin an goal hmasa ber a khung leh bawk - inelna pumpuiah match ruk khelin khelmualah minute 540 hun a hmang a, goal riat khungin assist vawi khat a nei. Brewster hnaih bertu Lassana N'Diaye (Mali) leh Abel Ruiz (Spain) ten goal ruk ve ve an khung.

Goal ven thiam Gabriel

World Cup U17-a goal ven thiam bera thlan chu Brazil goalkeeper Gabriel Brazao a ni. Kum 17 mi goalkeeper hian an ram hi semifinal bak thlenpui zo lo mah se an chet ṭhatna kawngah erawh a thawhhlawk hle - match sarih an khelhah inlan vekin goal nga chiah a chhuah a, vawi li clean sheet a nei.

Brazilian club ṭha Cruzeiro goalkeeper hian minute zawng zawng khel kim vekin khelmualah minute 630 hun a hmang a, hetih chhung hian save 29 zet a nei a, a save rate hi 85.3% a ni - Europe club lian ten an ngaihven chhunzawm a nih pawhin a mak lo ang.