Spurs mikual tur Zidane leh Real

Zinedine Zidane-a'n Totten­ham Hotspur nen an inhnehtawk hnuah Wembley Stadium-ah hnehna an chan a ṭul tur thu a sawi a, Spanish champion Real hi Cham­pions League group match khel turin zanin dar 1:15 hian England-a stadium hmingthang ber pakhatah hian an inlan dawn - La Liga lama talbuai mek Real Madrid tan fiahna a ni ang.

Tottenham aṭanga a hun laia khawvel player manto ber ni tura Real Madrid pantu Gareth Bale chuan training nei tawh mah se a la inlan thei dawn lo a, Premier League striker zinga hriam ber pakhat Harry Kane dinhmun a chiang lo bawk - Spurs manager Mauricio Pochettino chuan Kane chu damchiang lo chunga an chhawr luih loh tur thu a sawi.

Champion lai Real Madrid leh Tottenham te hian match thum an khelh tawhah point sarih ve ve hmuin an inel tawk hle a, October thlatir khan Real khelmualah 1-1 a an inhnehtawk tawh avangin zanina chak zawk tan Group H hmahruaitu nih theihna hun ṭha a ni.

Harh ngai Real

Spanish club lian Real Madrid hian Bale bakah keeper Keylor Navas an chhawr theih dawn lo a, kar tawp league match-a an goal neih chhun khungtu Isco chuan kartir lam khan training a zawm lo bawk; Isco hi a inlan a nih pawhin duhthusama fit a ni kher lo ang. Real thiampuipa Cristiano Ronaldo chungah mawhphurhna a sang zual dawn.

Portugal captain hian hrem vangin season tir lam match li a khel thei lo a, a rawn kir hnu­ah beisei angin a la che lo - league bikah goal khat chiah a la khung; Ronaldo hian instagram lamah "Rilru puthmang dik" tih a tarlang a, ram leh club tana goal thun khawl ni ṭhin hian a ropuina ang neih let a duh a, club lamin an mamawh bawk.

Real Madrid manager Zidane-a'n season hnih chhung lekin nomawi pasarih a chawi thei a, a player hmanthiam ṭhenkhat tel lo pawhin French manager hian Sergio Ramos, Luka Modric, Toni Kroos leh Karim Benzema te a la neih miau avangin Spurs lakah hnehna chan a tum ngam ang tih a chiang.

Kane a chiang lo?

Argentine manager Mauricio Pochettino kaih­­hruaina hnuaiah Spurs hian hma an sawn viau a, chutihrualin club European football-ah Real Madrid nena khaikhin tur erawh an la ni lo ang. Chutihrualin season kal laia goal 13 khung tawh England inter­national Kane a khel thei a nih chuan an mikhual team hi an hlau bik lo ang.

Liverpool an hneh ṭuma malpui hliam Kane chungchang sawiin Poch chuan, "Endik leh phawt a ni dawn a, kan zavaia ṭhattlanna tur ang berin thutlukna kan siam ang, ka ngaihdan ringawt a pawimawh bik lo a, he mi chungchangah chuan Kane rilru puthmang a pawimawh," tiin a sawi.

West Ham leh Manchester Uni­ted lakah tlawm hlim Poche­ttino chuan, "Tournament hrang hrang kan khel a, team leh kan hmunhma kan din chho mek a ni a, tuna pawimawh ber chu player zawng zawng ten inelna tak an hmachhawn a ni tih an hriat hi a ni," tiin a sawi.