Newcastle hnehin Burnley invawrh sang

Thawhṭanni zan khan Premier League inkhel pakhat a awm a, Burnley chuan midfielder Jeff Hendrick-a goal khat hmangin an mikhual Newcastle chu 1-0 in an hneh. Sean Dyche-a naute hian match 10 khelh aṭanga point 16 hmuin table-ah pasarihna an ni a, an chung chiaha awm Liverpool nen an point a inzat.

Sean Dyche-a'n Burnley kum nga a enkawl tlinna niah inkhel a dul a, team pahnihte goal lut loin an inṭhaṭhen mai dawn niin a lang hman. Amaherawhchu, minute 74-naah Newcastle tlarhnung an inthlahdah zauh, Johann Berg Gudmundsson-a cross chu vengtu nei lo Hendrick chuan tun season chhunga a league goal hnihna ni turin a khung - keeper Rob Elliot tan dan theih a ni lo.

Kai thar Newcastle hian inkhel

ṭantir lamah goal khung theihna hun

ṭha an nei, midfielder Ayoze Perez-a ball pet kul mawi tak mai chu Clarets keeper Nick Pope-a'n a dan sak a, forward Joselu chuan hun tawp dawn lamah goal ban hrulah a pet chhuak bawk. Rafael Benitez-a naute hi inelna hrang hrangah khualmuala an zinchhuah hnuhnung vawi 16 aṭangin vawi 12

ngawt an tlawm.

Burnley hian an khelmual Turf Moor-ah kum 2017 chhungin Premier League match 13 khelin vawi ruk ngawt clean sheet an nei thei a, manager nei loa awm mek Everton chuan team enkawltu Sean Dyche an hmutai hle nia sawi a ni. Goodison Park a pan dawn leh dawn loh zawhna chhangin Dyche chuan, "Ka hna ngai hi ka thawk chhunzawm zel ang," tiin Toffees pan a tum lo.

Hmasawnna

English manager Sean Dyche hian kum 2012 October thla khan Burnley a enkawl ṭan a, khatih hunlai khan English club te inelna sang ber dawt Championship table-ah 14-na an ni.

Kum 46 mi Dyche-a'n a enkawl hnuah zawi muangin hma an sawn zel a, inelna sang ber Premier League an inpet kai hnuah an season thumnaah pawh bul an ṭan fuh leh hle. A kaihhruaina hnuaiah hian league match 211 khelin vawi 85 hnehna an chang thei a ni.

Tun season chhung hian Chelsea an luhchhuah thei a, khualmualah Tottenham leh Liverpool te an inhnehtawk pui bawk - Turf Moor bikah a zawnin match li chhung hneh loh an tawng tawh lo bawk a ni.

Dyche chuan, "League a nih avangin thawklehkhata tlan chak thut ringawt a tawk lo a, marathon ang maiin thui tak tlan tur kan ni, tunah chuan a bul kan la ṭan chauh a ni," tiin a sawi.

Magpies an bil

Real Madrid leh Liverpool enkawl tawhtu Rafael Benitez enkawlna hnuaia khel Newcastle hian an league match hnuhnung vawi 10-ah match li ngawt goal khung loin hun an hmang ta; Christian Atsu, substitute Isaac Hayden leh Javier Manquillo te bakah Jonjo Shelvey te chu goal khung thei dinhmunah an ding - mah se an za vaiin an hriam tawk lo.

Magpies manager Benitez chuan, "Inkhel thunun tak chunga hnehna chang thei tur kan ni, kan result avang hian ka lawm lo takzet. Ball kan chelh rei a ngai a, khingpui te goal hmaah kan hlauhawm zual a ngai bawk. A khaikhawm nan chuan hmasawn kan ngai a ni," tiin a sawi.