Spalletti nauten kawng dik zawh zel

Inter Milan manager Luciano Spalletti chuan tun season Serie A nomawi inchuha intlansiak chu chetsual eih a thiang loh thu a sawi. Thawhṭanni zan khan Inter hian table mawngphah lama talbuai mek Verona chu 2-1 in an va luhchhuah.

Mikhual Inter tan Borja Valero-a goal hmahruai khung chu substitute Giampaolo Pazzini-a'n penalty aṭangin an sut a, hun tawp hma deuhin Croatian winger Ivan Perisic chuan chakna goal a khung a ni.

Roma manager hlui Spalletti naute hian hneh loh nei loin season an hmang tluang zel a, an tluk loh awmchhun chu Napoli chiah an ni. Gli Azzurri (The Light Blues) pawh hian hneh loh an la nei lo a, match 11 khelh tawh aṭangin point hnih chiah an la hloh.

Italian manager Spalletti chuan, "Chetsual zeuh chuan kan dinhmun a chhe nghal duai thei a, kawng dik kan zawh lai aṭang hian pen loh hram kan tum ang. Napoli an kaltluang ber a, Juventus leh Lazio ten min hnaih em em bawk, chutih laiin Roma pawh sawi hmaih an thiang lo," tiin a chung bera awm tur hriatthiam a harsat thu a sawi.