Werder Bremen-in manager ban

Bundesliga club Werder Bremen chuan Pathianni zan league match-a 3-0 ngawta Augsburg an ngam loh hnuah an manager Alex Nouri an ban a, tun season Bundesliga-a coach ban pathumna a ni. Nouri hma hian Andries Jonker (Wolfsburg) leh Carlo Ancelotti (Bayern Munich) te chu an hna aṭanga chawlh hahdamtir an lo ni tawh a ni.

Nouri thlaktu tur an zawn chhung chu Werder Bremen hi club under 23 coach Florian Kohfeldt chuan a enkawl dawn a ni. Bremen hi Bundesliga lamah table mawngphah dawttuah an awm mek a, league match 10 an khelh tawh aṭanga point nga hmuin goal thum chiah an la khung thei.

Nikum October khan Nouri hian Bremen hi a zawm a, tlak hlauhthawn-awma awm hman club hi chhanhimin pariatna a nihpui. Mahse, Pathianni zana an tlawm meuh hi chuan fan-te chuan an coach hi chhuak tura an duh thu an tlangaupui tawh a, Bremen CEO Klaus Filbry chuan, "Nikumah dinhmun harsa taka kan awmlaiin Alex hian min khai chhuak a, a chungah hian kan lawm reng tawh dawn a ni," tiin an coach chu a thlah.